Qazaqstandyq balýan paradzıýdodan alǵash ret álem chempıony atandy
ASTANA. QazAqparat - Qazaqstandyq Oljas Orazalyuly paradzıýdodan Lıssabonda ótip jatqan Álem chempıonatynda jeńimpaz atandy, dep habarlaıdy QazAqparat tilshisi.
QR dzıýdo federatsııasynan málim etkenindeı, Oljas 60 kelige deıingi salmaqta úzdik shyqty.
Ol alǵashqy beldesýinde ıspanııalyq Borja Pahıssany ıpponmen utty. Sosyn japonııalyq Takaakı Hıraıdy, shırek fınalda aljırlik Moýloýd Noýrany taza jeńdi. Jartylaı fınalda Ázerbaıjan eliniń ókili Orhan Jaraevty tize búktirdi. Fınalda aljırlik Ishak Oýldkoýıderdi jyǵyp, altynnan alqa taqty.
Buǵan deıin dzıýdodan Maksım Rakov pen Eldos Smetov álem chempıony atansa, endi, mine, O.Orazalyuly paradzıýdodan Qazaq elinde tuńǵysh ret osyndaı joǵary ataqqa qol jetkizip otyr.
Paradzıýdodan Qazaqstan quramasynyń bas jattyqtyrýshysy Jandos Qııanovtyń aıtýynsha, Oljas Orazalyuly Qyzylorda oblysy Jańaqorǵan aýdanynda 2000 jyly dúnıege kelgen. Dzıýdomen jeti jyl boıy shuǵyldanǵan. Bapkerleri - Qaırat Baıakenov, Rýslan Berkimbaı.
Eske sala keteıik, budan buryn dzıýdodan aralas komandalyq saıys jeńimpazdary anyqtalǵanyn jazǵan bolatynbyz.
