Qazaqstandyq balýan London Olımpıadasynyń qola medalin aldy

NUR-SULTAN. QazAqparat - Erkin kúresten qazaqstandyq balýan Dáýlet Shabanbaı «London-2012» Olımpıadasynyń qola medalimen marapattaldy, dep habarlaıdy QazAqparat Olympic.kz-ke silteme jasap.

D.Shabanbaıǵa Olımpıada medali saltanatty túrde Belgradta (Serbııa) ótken kúresten álem chempıonatynda tabystaldy. Sportshy medaldy Álem kúresiniń birlestigi (UWW) basshysy, HOK Atqarý komıtetiniń múshesi Nenad Lalovıchtiń qolynan aldy.
«Qudaıǵa shúkir, kópten kútken medaldi aldym! Halyqaralyq Olımpıada komıtetine, Álem kúresiniń birlestigi prezıdenti Nenad Lalovıch myrzaǵa, Qazaqstan Respýblıkasy Ulttyq Olımpıada komıtetiniń, Ulttyq federatsııanyń basshylyǵyna alǵysym sheksiz. Árqaısyńyzdyń jeke quttyqtaýlaryńyzǵa rahmet», - dedi D.Shabanbaı.
Júldelerdi qaıta bólýden keıin sportshy Olımpıada oıyndarynyń jeńimpazy boldy. Londondaǵy Olımpıadada Dáýlet Shabanbaı 120 keli salmaq dárejesinde óner kórsetip, besinshi orynmen aıaqtady.

Alaıda, keıinirek 2019 jyly dopıng synamalaryn qaıta teksergennen keıin, grýzın balýany Davıd Modzmanashvılı men Artýr Taımazovtyń (Ózbekstan) zańsyz esirtki qoldanǵany anyqtaldy.
Barlyq tekseristerden keıin bul sportshylardy dıskvalıfıkatsııalaý, sondaı-aq London Olımpıadasynda kórsetken nátıjelerin joıý týraly sheshim qabyldandy.
Nátıjesinde Dáýlet Shabanbaı Olımpıada oıyndarynyń qola júldegeri dep tanyldy. Komeıl Gasemı (Iran) men Bılıal Mahov jeńis tuǵyrynyń birinshi ornyn bólisse, qazaqstandyqpen birge amerıkalyq Tervel Dlagnev úshinshi orynǵa kóterildi.

Foto: olympic.kz