Qazaqstandyq balýan qyzdar Ispanııada bes medal jeńip aldy
ASTANA. QazAqparat - Áıelder kúresinen Qazaqstan quramasy Ispanııanyń Madrıd qalasynda ótken Gran-prı jarysynda bes medal jeńip aldy, dep habarlaıdy QazAqparat tilshisi.
QR kúres túrleri federatsııasy málim etkendeı Nurlan Amanqosov baptaıtyn elimizdiń boıjetkenderi atalǵan dodada el qorjynyna 3 kúmis 2 qola medal saldy.
Ispanııa astanasynda ótken Gran-prı týrnırinde úsh qyzymyz fınalda óner kórsetti. Ókinishke qaraı, barlyǵy da qarsylastaryna ese jiberip, jarystyń kúmis júldegeri atandy.
Atap aıtsaq, 53 kelidegi Juldyz Eshımova fınalda AQSh balýanynan utylsa, 55 kelidegi Marına Sedneva shved qyzynan jeńildi. 59 kelide qyrǵyz balýanyna jol bergen Madına Baqbergenova Gran-prı týrnıriniń kúmis júldegeri atandy.
Qorjynymyzǵa túsken eki qola medaldi Nazıra Amanjolova (59 keli) men Rıo Olımpıadasynyń qola júldegeri Elmıra Syzdyqova (76 keli) jeńip aldy.
Komandalyq esepte boıjetkenderimiz úshinshi orynǵa ıe boldy.
Sondaı-aq, erler arasyndaǵy básekede 70 kelide kúresken Aslan Qýanyshbekov kúmis júldeni qanaǵat tutty. Aslan fınalda mońǵol balýanynan utyldy.
