Qazaqstandyq balýan qyz Túrkııada ótken týrnırde úzdik úshtikten kórindi

NUR-SULTAN. QazAqparat - Qazaqstandyq balýan qyz Túrkııada ótken Victory Cup týrnırinde qola medal jeńip aldy, dep habarlaıdy QazAqparat tilshisi Mańǵystaý oblysy boıynsha áıelder kúresinen aǵa jattyqtyrýshy Anar Hamıtovaǵa silteme jasap.

Jattyqtyrýshynyń aıtýynsha, Mańǵystaýlyq balýan qyz Álııa Daýlet Túrkııada ótken Victory Cup halyqaralyq týrnırinde qola medal jeńip aldy. Baıraqty básekege álemniń túrli elinen grek-rım, erkin jáne áıelder kúresimen shuǵyldanatyn 500-deı jas sportshy kelgen. Atap aıtsaq, Frantsııa, Latvııa, Iran, ázerbaıjan, Túrkııa, Grýzııa jáne Qazaqstannan balýandar baq synaǵan.
«Bul doda bizdiń balýan úshin Azııa chempıonatynyń aldynda jaqsy syn boldy. Bizdiń sportshynyń tabandylyǵy, erik-jigeri jeńiske jeteledi. Onyń osy qasıetteri aldaǵy aıtýly jarystarda da jeńis tuǵyryna kóterilýge kómektesedi dep senemiz. Endigi qatysatyn týrnırimiz 3-18 maýsym aralyǵynda ótedi. Búgin boı aldyrǵan qatelikterge jol bermeýge tyrysamyz», - dedi Anar Hamıtova.
46 keli salmaqta óner kórsetken Álııa qola medal úshin talasta túrkııalyq balýanmen beldesip, basym tústi.