Qazaqstandyq balýan qyz Olımpıada joldamasyna ıe boldy
ASTANA. QazAqparat - Áıelder kúresinen Qazaqstan quramasynyń múshesi Nılýfar Raımova ІІІ Jasóspirimder Olımpıadasyna lıtsenzııa jeńip aldy, dep habarlaıdy QazAqparat tilshisi.
QR UOK-niń baspasóz qyzmeti málim etkendeı, Nılýfar Raımova mamyr aıynda Tashkentte ótken Azııa chempıonatynda qola júldeger atanǵan bolatyn. Alaıda, kúres túrlerindegi joldama tek birinshi oryn ıemdengen sportshyǵa ǵana berilgen edi. Sol kezde japondyqtar bes salmaqtyń barlyǵynda da jeńimpaz atanǵan soń, bireýinen bas tartýǵa májbúr bolǵan. Osylaısha, japonııalyq komanda 49 kelidegi balýan Akarı Fýdjınamıdi Olımpıadaǵa aparmaımyz dep sheshedi.
Osy salmaqta kúmis júldeger atanǵan ózbekstandyq Shohıda Ahmedova da joldamadan bas tartyp, jartylaı fınalda bolashaq chempıonnan jeńilgen Nılýfar Raımova lıtsenzııaǵa ıelik etti.
«Árbir sportshynyń jeńisiniń artynda úlken komandanyń eńbegi tur. Bul ujymnyń da eńbegi. Sondyqtan, jas sportyshymyzǵa sáttilik tileımin», - deıdi áıelder kúresi boıynsha federatsııanyń vıtse-prezıdenti Gýzel Manıýrova.
Aıta keteıik, Jasóspirimder Olımpıadasy 6-18 qazan aralyǵynda Argentınanyń Býenos-Aıres qalasynda ótedi.
