Qazaqstandyq balýan qyz Azııa birinshiliginde qola júldege ıe boldy
ASTANA. QazAqparat - Úndistannyń Nıý-Delı qalasynda ótip jatqan jastar arasyndaǵy Azııa chempıonatynyń úshinshi jarys kúni bozkilemge shyqqan boıjetkender arasynda otandasymyz Marına Zakshevskaıa qola medal jeńip aldy, dep habarlaıdy QazAqparat tilshisi.
QR Kúres túrleri federatsııasynyń baspasóz qyzmeti málim etkendeı, Marına Zakshevskaıa 50 keli salmaqta el namysyn qorǵap, Azııa chempıonatynyń qola júldegeri atandy. Marına shırek fınalda qytaı balýanynan jeńilgenine qaramastan jubanysh beldesýin sátti ótkizip, qola medal úshin kúresýge múmkindik aldy. Sheshýshi báseke úndistandyq balýanmen ótip, Marına beldesýdi 3:2 esebimen aıaqtady.
Ókinishke qaraı, 68 kelidegi Valerııa Goncharova qola medal úshin bolǵan beldesýde káris balýanynyń aldynda álsizdik tanytyp, besinshi orynǵa ıe boldy.
Aıjan Súıdýova (55 keli), Ekaterına Frıstova (59 keli), Aınagúl Ábırova (76 keli) Azııa chempıonatynyń shırek fınalynda jaystan shyǵyp qaldy.
Esterińizge sala keteıik, osyǵan deıin atalǵan dodada grek-rım kúresinen synǵa túsken balýandarymyz 2 altyn, 5 qola medalmen komandalyq esepte ekinshi orynǵa ıe bolǵany týraly jazǵan bolatynbyz.
Foto: www.wrestling.kz
