Qazaqstandyq balýan Iranda júldeger atandy
ORAL. QazAqparat - Qazaqstandyq balýan Nurlan Bekjanov Iranda erkin kúresten ótken Tahtı kýbogynyń kúmis júldegeri atandy, dep habarlaıdy «QazAqparat» tilshisi.
Álemdegi eń úlken týrnırlerdiń biri bolyp esepteletin aıtýly jarys barysynda 74 kg salmaqta kúresken Nurlan qos birdeı ırandyq balýandy, sodan keıin armıan jáne túrkmen sportshylaryn tize búktirdi. Tek fınalda ǵana Bolgarııa eliniń namysyn qorǵaǵan sheshen jigiti Alıpasha Ýmarpashaevtan utyldy. Jartylaı fınalda osy balýanǵa ese jibergen taǵy bir qazaqstandyq balýan Bolat Saqaev qola júlde úshin básekede túrkııalyq ıAkýp Gordan jeńilip qaldy.
Osylaısha, Qazaqstannan tek N.Bekjanov qana júldege ilikti.
Aıta keteıik, Nurlan Bekjanov 2016 jyly Býdapesht qalasynda erkin kúresten álem chempıonatynda kúmis júldeger atanǵan bolatyn. Olımpıadalyq emes salmaq dárejelerindegi kúres túrlerinen alǵash ret ótken sol dodada Nurlan 70 kg salmaqta kúresken edi. Qazirgi ereje boıynsha balýandar kúresetin kúni ólshenedi, kóp salmaq qýa almaıdy. Sondyqtan Nurlan Bekjanov Irandaǵy týrnırde 74 kg salmaqta shyqty.
N.Bekjanov kúrestegi jolyn BQO-nyń Syrym aýdany Buldyrty aýylynda bastaǵan. Alǵashqy bapkeri - Qazaqstannyń eńbek sińirgen jattyqtyrýshysy Asqar Sáýkelın. Astana qalasyndaǵy qazirgi jattyqtyrýshysy - Asqar Ábdirashev.
