Qazaqstandyq balýan áskerı sambodan álem chempıony atandy
ASTANA. QazAqparat - Býhareste erler men áıelder arasynda ótip jatqan álem chempıonatynda qazaqstandyq Temirlan Ihsanǵalıev áskerı sambodan jeńimpaz atandy, dep habarlaıdy QazAqparat tilshisi.
Dúnıejúzilik dodada 82 kg salmaqta kilemge shyqqan Temirlan frantsýz, qyrǵyz palýandaryn merziminen buryn jeńdi. Sondaı-aq, qazaqstandyq áskerı sambo sheberine túrkimen sportshysy qarsy tura almady.
Budan buryn da talaı dodaǵa qatysyp, olja salyp, tájirıbesi ábden tolysqan 32 jasar T.Ihsanǵalıev fınalda reseılik álem chempıony, ózinen eki jas úlken Dmıtrıı Samoılovpen beldesti.
Qazaqstandyq palýan belsendi kúresip, qarsylasynan basymdylyq kórsetti. Esep 1:0 bolǵanymen, Temirlan reseılik samboshyǵa esh múmkindik bergen joq.
Osylaısha Temirlan Ihsanǵalıev áskerı sambodan 82 salmaqta chempıon atandy.
Taǵy bir qazaqstandyq Gúlnur Erbolova sambodan 52 kg salmaqta qola júldege ıe boldy. Gúlnur osymen ekinshi jyl qatarynan úzdik úshtikke iligip otyr.
1986 jyly Terekti aýdanynda dúnıege kelgen Temirlan sporttaǵy jolyn erkin kúresten bastady. Alǵashqy bapkeri ákesi Merdan Ihsanǵalıev boldy. Keıin áskerı samboǵa aýysqan T.Ihsanǵalıev buǵan deıin tórt márte álem chempıonatyna qatysyp, sonyń úsheýinde qola júldeger atandy. Al 2015 jyly Marokkonyń Kasablanka qalasynda 74 kg salmaqta kúmis júldege qol jetkizdi.
Sonymen qatar, qoıan-qoltyq kúresten álem birinshiliginde qola, aralas jekpe-jekten osyndaı jarysta kúmis medalǵa ıe boldy.
Temirlan Ihsanǵalıevti áskerı samboǵa marqum Qazbek Ibrashev baýlydy. Qazir Temirlan Nuftolla Túmenovtiń qolastynda jattyǵady. N.Túmenov eresekter arasyndaǵy osy álem chempıonatynda qazaq tóreshilerinen alǵash ret bas hatshy mindetin atqarýda.
Eske sala keteıik,keshe taǵy bir batysqazaqstandyq balýan Nurbol Serikovtiń sambodan álem chempıony atanǵanyn jazǵan bolatynbyz.
