Qazaqstandyq balet juldyzy ıtalıandyqtardyń súıispenshiligine bólendi
ASTANA. QazAqparat - Kóptegen bedeldi halyqaralyq baıqaýlardyń gran-prı ıegeri, «Astana Opera» teatrynyń jetekshi solısi Baqtııar Adamjan alǵash ret HH ǵasyrdaǵy kórnekti horeograf Rolan Petıdiń qoıylymyndaǵy «Bozbala men ajal» baletindegi Bozbala basty rólin somdady. Bul týraly QazAqparat teatrdyń baspasóz qyzmetine silteme jasap habarlaıdy.
Qoıylym aty ańyzǵa aınalǵan bıshi ári horeograf Rýdolf Nýreevke arnalǵan Tributo a Rudolf Nureyev halyqaralyq gala-baleti aıasynda 28 shilde kúni bizdiń dáýirimizge deıingi І ǵasyrdan beri saqtalyp kele jatqan kóne rımdik amfıteatr, Spoleto (Italııa) Rım teatrynyń ashyq sahnasynda ótken bolatyn. Álemdik balet juldyzdarynyń oryndaýynda kórermenderge R. Nýreevtiń repertýarynan nómirler usynyldy.
Rolan Petıdiń «Bozbala men ajal» bir bólimdi ataqty baleti 1946 jyly Iogann Sebastıan Bahtyń Passakalıa mýzykasyna qoıyldy, oǵan arqaý bolǵan Jan Koktonyń óleńmen jazylǵan lıbrettosy. Gala-baletke arnap qoıylymdy júzege asyrǵan R. Petıdiń assıstenti - baletmeıster Lýıdjı Bonıno, ol ózi de bir kezderi Bozbalanyń partııasyn oryndaǵan bolatyn. Baqtııar Adamjannyń sahnadaǵy serigi bolǵan áıgili mılandyq La Skala teatrynyń prıma-balerınasy Nıkoletta Mannı.
Budan bólek, Baqtııar Adamjan osy keshte Vengrııa memlekettik operasynyń prımasy Tatıana Melnıkpen L. Mınkýstyń «Don Kıhot» baletinen Pa-de-deni oryndady. Italıandyq kórermen qaýym B. Adamjannyń árbir sahnaǵa kóterilýin tolassyz qoshemetpen qarsy alyp, qazaqstandyq balet juldyzyn zor súıinishpen qabyldady.
