Qazaqstandyq balet Valensııany baǵyndyrdy
ASTANA. QazAqparat - Ispanııanyń eń iri qalalarynyń biri Valensııada «Astana Opera» teatry balet trýppasynyń oryndaýyndaǵy «Aqqý kóli» baleti anshlagpen ótti, dep habarlaıdy QazAqparat teatrdyń baspasóz qyzmetine silteme jasap.
Ispan jurtshylyǵy astanalyq teatrdyń ónerine tánti bolyp, bir dúrlikti. Ispanııaǵa grımerler, kostıýmerler men sahna mashınısterin qosqanda, 100 adamnan astam ártister quramy keldi. Valensııaǵa trýppa aty álemge áıgili opera ánshisi Plasıdo Domıngonyń shaqyrtýymen bardy. P.Chaıkovskııdiń baletine arnalǵan sán-saltanaty jarasqan dekoratsııalar Sofııa Patshaıymnyń óner saraıy sahnasynyń (Valensııa) ajaryn aıshyqtaı tústi. Teatr jańa, ol 2005 jyly ashyldy. 1400 oryndyq zal álemdik balet klassıkasy jaýharyn kórýge asyqqan kórermenderge áp-sátte lyq toldy.
«Aqqý kóli» alǵash ret shamamen bir jarym ǵasyr buryn qoıylǵan bolatyn. Odan beri dýalanǵan arý-aqqý Odetta men Zıgfrıdtiń mahabbat hıkaıasy, eń aldymen, keremet mýzykasymen, sondaı-aq kópshilik oıyn-saýyqtyǵy ári jeke partııalardyń sheberlikpen oryndalýymen teatrqumar qaýym nazaryn ózine aýdaryp keledi. Zulym sıqyrdyń kúshimen qusqa aınalǵan arý týraly sıýjet folklorlyq ertegi áleminde keń taraǵan. Chaıkovskıı baletinde Zıgfrıd hanzada Odettanyń qutqarýshysy, alaıda onyń baıqaýsyz jasaǵan opasyzdyǵy qasiretti kúnáǵa aınalady.
29 jeltoqsanda spektakldegi basty partııalardy oryndaǵandar: Qazaqstannyń eńbek sińirgen qaıratkeri Áıgerim Beketaeva (Odetta-Odıllııa), halyqaralyq baıqaýlardyń laýreaty Oljas Tarlanov (Zıgfrıd hanzada), Serik Naqyspekov (Shýt) jáne Jánibek Imanqulov (Rotbart).
Kórermender elordalyq bıshilerge oryndarynan tik turyp qoshemet bildirip, solıster sahnadan shyǵyp ketkenge deıin «jaraısyńdar!» degen ystyq yqylastaryn jetkizip jatty.
«Spektakl bastalǵan sátten bastap sońyna deıin ártister asqan sheberlik pen tamasha darynyn kórsetti, al dekoratsııalar men rekvızıtterdiń árbir bólshegi óziniń ásemdigimen tańdandyrdy», - dep atap ótti Ofelııa Peres esimdi kórermen.
Sofııa patshaıymnyń Óner saraıynda 29 jeltoqsan men 2019 jyldyń 5 qańtary aralyǵyndaǵy «Aqqý kóli» baletiniń gastroldik kórsetilimi «Rýhanı jańǵyrý» baǵdarlamasynyń aıasynda QR Mádenıet jáne sport mınıstrliginiń qoldaýymen ótip jatyr. Budan keıin osy balet óneriniń jaýhar týyndysy 11-13 qańtar aralyǵynda Italııada kórsetiledi.
Balet trýppasynyń kórkemdik jetekshisi - Reseıdiń Halyq ártisi Altynaı Asylmuratova. Dırıjerler - Qazaqstannyń eńbek sińirgen qaıratkeri Abzal Muhıtdınov jáne Arman Orazǵalıev.
Kún shýaqty Ispanııa Chaıkovskıı baletin súısine tamashalap jatqanda, merekelik jańa jyldyq Astanada opera solısteriniń kontserti anshlagpen ótýde. 29 jeltoqsan kúni keshkisin elordalyq kórermen úsh kún qatarynan beriletin «Astana Opera» quttyqtaıdy» kontsertiniń alǵashqysyn tamashalady. Dırıjerlik pýlt basyna shyqqan baǵdarlamanyń avtory ári bastamashysy - Qazaqstannyń eńbek sińirgen qaıratkeri, maestro Alan Bóribaev tamasha óner kórsetti.
Jetekshi solıster kórermen aldynda jańa qyrynan kórindi. Medet Chotabaev, Jannat Baqtaı, Talǵat Musabaev, Janat Shybyqbaev, Bıbigúl Januzaq jáne t.b. opera óneri juldyzdarynyń oryndaýynda alǵash ret sahnada operettalardyń arııalary men sahnalyq kórinisteri shyrqaldy. Kórermen nazaryna I.Shtraýstyń «Letýchaıa mysh», «Za chto, o, Boje moı...» operettalarynan tertset, F.Legardyń «Veselaıa vdova» operettasynan septet, V.A.Motsarttyń «Volshebnaıa fleıta» operasynan Papageno men Papagenanyń dýeti jáne t.b. týyndylar usynyldy.
Kontsert aıaqtalǵan soń tyńdarmandar keremet kóńil-kúı men tamasha jańa jyldyq tartý úshin «Astana Opera» shyǵarmashylyq ujymyna alǵys bildirdi.
