Qazaqstandyq balalardyń kópshiligin AQSh azamattary asyrap alǵan - J. Túımebaev
ASTANA. Qańtardyń 27-si. QazAqparat /Qanat Mámetqazyuly/ - Qazaqstandyq balalardyń kópshiligin AQSh azamattary asyrap alǵan.
Bul týraly búgin QR Parlamenti Májilisiniń jalpy otyrysynda «Qazaqstan Respýblıkasynyń balalardy qorǵaý jáne balany sheteldik asyrap alýǵa qatysty yntymaqtastyq týraly konventsııaǵa qosylýy jáne ratıfıkatsııalaýy týraly» zań jobasyn talqylaý barysynda QR Bilim jáne ǵylym mınıstri Janseıit Túımebaev málim etti, dep habarlaıdy QazAqparat.
«Sheteldik azamattar asyrap alǵan qazaqstandyq balanyń kámelet jasqa tolǵanǵa deıin jyl saıyn esep berýge mindetti. Qazirgi kezeńde sheteldik asyrap alýshylar bul normany tolyq oryndap otyr. Jalpy, qazaqstandyq balalardyń kópshiligin AQSh azamattary asyrap alǵan. Bul eldegi asyrandy balalar sany - 6 myń 406. Sonymen birge, Ispanııa azamattary - 600, Belgııa - 343, Germanııa - 173, Kanada - 167, Irlandııa - 140, Frantsııa 131 balany asyrap alǵan», dedi mınıstr. Onyń aıtýynsha, sheteldikter 1 jastan 3 jasqa deıingi 5 myń 892 balany, 4 jastan 6 jasqa deıingi - 1 myń 278, sondaı-aq 7 jastan joǵary 999 balany asyrap alǵan.
«Ulttyq quramy boıynsha shetel asyp ketken balalardyń ishinde qazaqtar sany - 3 myń 702, orystar - 4 myń 57, basqa ulttar - 360», dedi J. Túımebaev.
