Qazaqstandyq balalardyń eń senimdi aqparat kózi anyqtaldy
ASTANA. QazAqparat - Qazaqstandyq balalar óz ata-analaryn eń senimdi aqparat kózi dep esepteıdi. Bul tujyrymdy Astanada ótken «Baqytty bala - baqytty otbasy - baqytty el» atty dóńgelek ústel aıasynda Qoǵamdyq pikirdi saraptaý ortalyǵynyń mamandary málimdedi, dep habarlaıdy QazAqparat tilshisi.
Saýalnamaǵa 8-17 jas aralyǵyndaǵy Qazaqstannyń túpkir-túpkirinde turatyn 2 myńnan astam bala qatysty. Olardyń 60 paıyzy eń senimdi aqparat kózi retinde óz ata-analaryn kórsetken. Qalǵan 20%-y - ınternet, 13%-y - teledıdar dep jaýap bergen.
Aıta keterligi, balalardyń barlyǵy derlik basylymdardy oqymaıdy (91%) jáne radıo tyńdamaıdy (97%).
Sondaı-aq, VKontakte men WhatsApp qazaqstandyq balalar arasyndaǵy tanymal áleýmettik jeliler tiziminde kósh bastady. Saýalnamaǵa qatysýshylardyń teń jartysy bul jelilerdi «turaqty» nemese «jıi» qoldanady. Tanymal áleýmettik jeliler úshtigin Instagram túıindeıdi.
Zertteý nátıjesine sáıkes, Internet, teledıdar, gazet-jýrnaldar men radıo Qazaqstan balalarynyń ómirge degen kózqarasynyń qalyptasýynda mańyzdy ról oınamaıdy. Balalardyń pikirinshe, qundylyqtardyń damýyna úıdegi tárbıe, mektep, dostar jáne ata-ana úlgisi yqpal etedi.
