Qazaqstandyq balalar jazýshysynyń romany Garrı Potterden kem túspeıdi
ASTANA. QazAqparat - «Altyn tobylǵy» ádebı baıqaýynyń «Úzdik balalar ádebıeti» nomınatsııasy boıynsha jeńimpazy Záýre Tórehanova Qazaqstandaǵy balalar ádebıetiniń damýy jóninde pikir bildirdi, dep habarlaıdy QazAqparat tilshisi.
Úzdik shyǵarma avtory qazaqstandyq balalar jazýshylarynyń álem moıyndaǵan sheteldik ádebıet ókilderimen básekege túse alatynyna úmit bildirdi.
«Bıyl «Almaty kitap» baspasy 2014 jyly «Altyn qalam» baıqaýynda top jarǵan «Ámına Turan kóshpendiler elinde» atty jazbamdy satyp aldy. Bul meniń «balalar men jasóspirimder romany» janryndaǵy tyrnaqaldy eńbegim jáne ol «Garrı Potter», «Tanıa Grotter» syndy sheteldik týyndylardan kem túspeıdi dep úmittenemin. Elimizdegi balalar ádebıetiniń de odan ári damı túsetinine úmittenemin», - dedi ol Astanada ótken marapattaý rásiminde.
Sonymen birge Záýre Tórehanova Táýelsizdik jyldary Qazaqstandaǵy balalar ádebıetiniń kenjelep qalǵanyn moıyndady.
«Bizde proza, poezııa, dramatýrgııa janrlary jaqsy damyp keledi, alaıda balalar ádebıeti sál kenjelep qaldy. Balalar jazýshylary óte az, sebebi bul jaýapkershilikti talap etetin óte qıyn sala. Balalar - bizdiń bolashaǵymyz. Olar ádebı shyǵarmalardan ózin jáne otbasyn kórýi tıis», - dep esepteıdi jazýshy.
Eske sala ketsek, búgin Astanada jas ádebıetshilerge arnalǵan dástúrli «Altyn tobylǵy» shyǵarmalar baıqaýynyń jeńimpazdary marapattaldy. Jalpy júlde qory 5,5 mıllıon teńgeni quraıtyn bul bedeldi baıqaýdy Qazaqstan Respýblıkasynyń Tuńǵysh Prezıdenti - Elbasy qory bıyl úshinshi ret uıymdastyryp otyr. Jyl saıyn «Altyn tobylǵy» baıqaýyna 18-35 jas aralyǵyndaǵy jas daryndar qatysyp, qomaqty aqshalaı júldege ıe bola alady .
