Qazaqstandyq balalar temirjol arqyly saıahat jasaıdy
ASTANA. QazAqparat - 2018 jyldyń jazynan bastap myńnan astam qazaqstandyq balalar respýblıkanyń túrli óńirlerine poıyzben saıahattaıdy, dep habarlaıdy QazAqparat tilshisi.
Osylaısha, «Kazakh Tourism» ulttyq kompanııasy balalar saıahatynyń baıaǵy dástúrine qaıta jan bitirýdi kózdep otyr.
«Saıahat temir jol arqyly júrgiziledi. Negizinen Ońtústik Qazaqstan, Ortalyq jáne Shyǵys Qazaqstan óńirlerine aınalma baǵdar josparlap otyrmyz. Poıyzdyń artyqshylary nede? Poıyz - dóńgelegi bar baspana tárizdi. Onda balalar muǵalimder men ádiskerlerdiń qaraýynda, qaýipsiz jerde bolady. Olardy jatqyzatyn jataqhana, mektep izdep áýre bolmaıdy. Basty artyqshylyǵy - osy. Balalar keı óńirlerge toqtap, ekskýrsııalyq baǵdarlama aıasynda óz zamandastarymen kezdese alady, slet ótýi de múmkin. Qazir baǵdarlama ázirlenip jatyr. Naýryz aıynyń ortasyna daıyn paketter ázirlenedi», - dedi «Kazakh Tourism» UK» AQ basqarma tóraǵasynyń orynbasary Tımýr Dúısenǵalıev Astanada ótken «Balalar men jasóspirimder týrızmin damytýdyń jańa múmkindikteri» otyrysynda.
Ulttyq kompanııa ókiliniń aıtýynsha, naýryz aıynda balalardy irikteýdiń tolyq erejesi jarııalanady.
«Balalardy saıahatqa tartý boıynsha jergilikti atqarý organdary men qoǵamdyq uıymdardy jumyldyramyz. Balalardy irikteý erejesi jetildirilgen soń, barlyǵyna habar beriledi. Bálkim, sabaǵyn jaqsy oqyp júrgen balalardy saıahatpen yntalandyratyn shyǵarmyz. Jáne óz aýdanynan syrtqa shyǵýǵa múmkindigi joq, áleýmettik az qamtylǵan otbasynyń balalaryn da umytpaǵan jón. Jazǵy kanıkýl barysynda mundaı poıyz saıahatyn 4-5 ret uıymdastyramyz», - dep óz sózin tolyqtyrdy ol.
Sondaı-aq, T. Dúısenǵalıev aýqatty ata-analardyń qarajat tólep, saıahatqa óz balalaryn jibere ala ma degen jýrnalıst suraǵyna jaýap berdi.
«Bári poıyzdyń syıymdylyǵyna baılanysty. Mundaı múmkindikti qarastyryp otyrmyz, biraq bul úshin alǵashqy saıahattyń qalaı ótetinin kórý kerek. Іs júzinde, munda túrli baǵytqa júretin bir ǵana poıyz bar», - dedi T. Dúısenǵalıev.
Saıahatqa «Qazaqstan temir joly» UK» AQ demeýshilik kórsetken. Odan bólek, Rýhanı Jańǵyrý baǵdarlamasy aıasynda qarjylandyrý múmkindikteri kózdelgen.
Foto: o-krohe.ru
