Qazaqstandyq balalar Artektegi halyqaralyq baıqaýda el namysyn abyroımen qorǵap qaıtty
ALMATY. 15 shilde. QazAqparat /Názıra Eleýhan/ -Búgin «Artek» XIX Halyqaralyq balalar kınofestıvali men atalmysh shara aıasynda ótken VI «Şaslıvi doloni»- «Baqytty alaqan» qaıyrymdylyq baıqaýyna qatysqan qazaqstandyq delegatsııa elge oraldy.
«Qazaqstandyq delegatsııanyń barlyq músheleri «Baqytty alaqan» halyqaralyq baıqaý-festıvaliniń dıplomanttary atandy. Mundaı ataqqa tek biz ǵana ıe boldyq»,-dep atap ótti respýblıkalyq vedomstvoaralyq «Qazaqstan -Demalystary» úılestirýshi ortalyǵynyń jetekshisi Baqyt Jańabaeva.
Onyń aıtýynsha, «Şaslıvi doloni» - tanymal áleýmettik joba. «Jyl saıyn bul shara qanatyn jaıyp keledi, qatysýshylardyń da sany artýda. Bıyl bul sharaǵa Almatynyń talantty balalary qatysty. Olar jobanyń barlyq sharalaryna qatysty. 2011 jylǵy baıqaý-festıvalǵa Ýkraınanyń barlyq oblystarynan 600-den asa jetim balalar, sonymen qatar, Belarýs, Reseı, Moldova, Qazaqstan, Germanııa, AQSh, Indııa jáne Nıderland elderinen ókilder jınaldy»,-dedi ol.
Qazaqstandyq artekshiler el abyroıyn laıyqty qorǵaǵan. Birneshe dıplomdar men gramotalardy, sheberlik sertıfıkattar men estelik syılyqtardy jeńip alǵan.
Almaty qalasynyń Alataý aýdanyndaǵy №160 mekteptiń 10 synyp oqýshysy Raýan Raqymjanov qazaqstandyq delegatsııa ishinde eń úzdik óner kórsetken qatysýshy bolǵan. Ol onnan asa marapat pen ár túrli sporttyq jáne shyǵarmashylyq atalymdardyń jeńimpazy, sonymen qatar, sýǵa júzý jarysynyń chempıony atanǵan. Raýan sonymen qatar, sporttyq bı túrinen, vokal jáne bard ánderi baıqaýynyń úzdigi atanǵan. Al, Áýezov aýdanyna qarasty №122 mekteptiń 9 synyp oqýshysy Satbek Sarjanov eki jobanyń - «Orıgamı» men «Keramıka» shyǵarmashylyq baıqaýynyń júldegeri atanǵan.
B.Jańabaevanyń aıtýynsha, qazaqstandyq delegatsııa 2000 jyldan Artekte ótetin, muǵalimder men oqýshylarǵa arnalǵan kásibı-shyǵarmashylyq bilim berý jobalaryna qatysyp keledi.
