Qazaqstandyq BAQ kandıdattar naýqanynan aqparat taratýda teńdik qaǵıdatyn saqtady - EQYU DIAQB
EQYU mıssııasynyń málimetinshe, saılaý kúni tynysh ótti, daýys berý utymdy uıymdastyrylǵan jáne jalpy rásimder saqtalǵan.
«Saılaýdy ótkizýge quzyrly organdar BAQ-ta daýys berýshilerge aqparatty keńinen taratty. Ortalyq saılaý komıssııasy zańnamada belgilengen merzimge sáıkes saılaýǵa daıyndyqty tıimdi júzege asyrdy. OSK tikeleı efırde ashyq otyrystar ótkizip, qabyldanǵan sheshimdi sol kúni jarııalap otyrdy. Sonymen qatar ortalyq saılaý komıssııasy tikeleı efırde baıqaýshylar, BAQ jáne partııalardyń senimdi ókilderiniń qatysýymen otyrystardy turaqty uıymdastyrdy. Otyrystan soń baspasóz máslıhaty ótip turdy. OSK sheshimderiniń qabyldanǵan kúni onlaın jarııalanyp otyrǵany oń baǵasyn aldy», - delingen EQYU bıýrosynyń demokratııalyq ınstıtýttar jáne adam quqyqtary jónindegi mıssııasynyń málimdemesinde.
Sondaı-aq málimdemede sot tóreligin tsıfrlandyrý salasyndaǵy sońǵy bastamalardyń shaǵym túsirý protsedýrasyn jeńildetip, memlekettik organdardyń jaýap berý jyldamdyǵyn arttyrǵany oń nátıje ekeni aıtylǵan.
«Múmkindigi shekteýli jandardyń saılaýǵa qatysýyna, saılaý ótkizý jáne ákimshilik sot isin júrgizý jónindegi organdardyń daýlardy sheshýi úshin rásimdik negizge qatysty eleýli tehnıkalyq ózgerister baıqalady. Múgedek jandardyń saılaýǵa qatysýyna, saılaý ótkizý jónindegi organdardyń daýlardy sheshýi úshin rásimdik negizge jáne ákimshilik sot isin júrgizýge baılanysty eleýli oń qadamdar jasaldy. Mıssııa baqylaǵandaı saılaýaldy úgit-nasıhat ótkizý oryndarynyń jartysynan kóbi múmkindigi shekteýli jandar úshin qoljetimdi boldy. Saılaý naýqanyna daıyndyq onlaın, betpe-bet ári beıtarap túrde uıymdastyryldy. Sondaı-aq mıssııa saılaý naýqany kezinde ultqa bóliný, kemsitýdi baıqamady, - delingen habarlamada.
Odan bólek kandıdattarǵa memlekettik bıýdjet esebinen efır ýaqyty men baspa alańynyń teńdeı úlestirilgeni atap ótildi.
«578 BAQ-qa júrgizilgen monıtorıngke sáıkes, olar saılaý týraly aqparat taratýda teńdik qaǵıdatyn saqtady. Monıtorıng júrgizilgen televızııalyq stantsııalar, ózderiniń jańalyqtar baǵdarlamasynda saılaý aldyndaǵy kandıdattarǵa bólingen efır ýaqytyn teń bólý mindettemesin saqtady. Kóptegen telearnada jańalyqtaryn sýrdoaýdarma arqylytaratyldy. «QR Saılaý týraly» Zań jáne ákimshilik protsedýralyq kodeks saılaýǵa qatysty daýlardy sheshýdiń aqylǵa qonymdy merzimderin belgileıdi. Sońǵy jyldary ádilet, quqyq qorǵaý organdaryna jáne sottarǵa saılaýǵa baılanysty shaǵymdar berý úshin onlaın-portal qurylyp, tsıfrlandyrý boıynsha aıtarlyqtaı bastamalar engizildi. Osylaısha EQYU bıýrosynyń demokratııalyq ınstıtýttar jáne adam quqyqtary jónindegi mıssııasynyń barlyq áńgimelesýshisi shaǵym berý rásimin edáýir jeńildetip, memlekettik organdardyń den qoıý jyldamdyǵynyń artqanyn atap ótti», - delingen resmı habarlamada.
