Qazaqstandyq azamat Túrkııadaǵy oqıǵa týraly: Adamdar tankterdiń jolyn kesý úshin kóshelerge shyqty
ALMATY. QazAqparat - «QazAqparat» tilshisine bergen suhbatynda «Habar» jáne «24 KZ» telearnalarynyń menshikti tilshisi Erjan Júsip Túrkııadaǵy oqıǵa týraly baıandap berdi.
Onyń aıtýynsha, tártipsizdikter keshe keshki ýaqytta bastalǵan.
«Eshkim bulaı bolady dep oılaǵan joq. Men bul ýaqytta keshki asymdy iship otyr edim. Eń birinshi aqparat Tvıtter áleýmettik jelisinde paıda boldy. Osy áleýmettik jelini paıdalanýshylar túngi saǵat 22.00 shamasynda Ankaranyń ústinen áskerı ushaqtar ushyp jatqandyǵyn, Ystambul qalasynda eki kópirdiń jabylǵandyǵyn jazdy.
Keıin, áskerılerdiń Túrkııa Prezıdentiniń rezıdentsııasyn basyp alǵandyǵy jaıynda aqparat paıda boldy.
Búlikshiler toby muny áskerı tóńkeris dep málimdedi. Budan keıin, 15-20 mınýttan keıin alǵashqy málimetter paıda bola bastady. Adamdar áleýmettik jeli men telearnalyq habarlardy muqııat baqylap otyrdy», - dedi E. Júsip.
Odan ári Túrkııanyń reıtıngtik NTV telearnasynyń tikeleı efırine telefon arqyly Túrkııanyń Premer-mınıstri Bınalı Iyldyrym shyqty.
Ol bolyp jatqan oqıǵaǵa áskerı tóńkeris dep baǵa berýge bolmaıtyndyǵyn aıtty. Premer halyqty tynyshtyqqa shaqyryp, qazir jaǵdaıdyń turaqtalǵandyǵyn, barlyǵy baqylaýǵa alynǵandyǵyn, kináliler jazaǵa tartylatyndyǵyn málimdedi.
«Biraq, keıin jaǵdaı shynynda da qaýipti bola bastady. Kóp uzamaı Prezıdenttiń ózi Skype arqyly tikeleı efırge shyǵyp, shyn mánisinde el qarýly kúshteriniń belgili bir áskerleri bılikti basyp alýǵa áreket jasaǵandyqtaryn, osylaısha opasyzdyqqa barǵandaryn málimdedi.
Ol halyqty ortalyq alańdarǵa, áýejaılarǵa shyǵyp, búlikshilerdiń áreketine narazylyq bildirýge shaqyrdy. Osy ýaqytta Atatúrik áýejaıy sekildi strategııalyq mańyzy bar nysandarǵa tankter jyljı bastady.
Ulttyq barlaý ǵımaratynyń aldynda qarýly qaqtyǵys boldy. Tóńkerisshiler ony basyp alǵysy keldi.
Olar Ystambuldaǵy Іshki ister basqarmasyn da basyp alǵysy kelip, ol jaqqa tankterdi baǵyttady. Halyq Prezıdenttiń málimdemesinen keıin, kóshelerge, alańdarǵa shyǵyp, tankterdiń ótýine jol bermedi», - dedi otandasymyz.
Al búlikshilerdiń málimdeýinshe, olar jemqor bılikti taqtan taıdyrýǵa tyrysqan.
«Eń qyzyǵy, Túrkııanyń Qarýly Kúshteriniń resmı saıtynda bıliktiń basyp alynǵandyǵy týraly aqparat paıda boldy. Odan keıin, ınternet pen áleýmettik jeliler nashar jumys isteı bastady.
Al kóp uzamaı turǵyndar azyq-túlik satyp alý úshin jappaı dúkenderge aǵyla bastady. Óıtkeni, erteńgi kúnniń qalaı bolatyny belgisiz edi.
Bul ýaqytta bankomattar, janar maı quıý stansalary jáne qoǵamdyq kólik jumys istemedi. Buqaralyq aqparat quraldarynyń málimdeýinshe, Ystambuldyń keıbir aýmaqtarynda jarylys dybystary estilipti.
Keıin, búlikshiler Túrkııa Qarýly Kúshteriniń basshysy, olardyń qolyna kepildikke alynǵandyǵyn málimdedi.
Tańǵa qaraı onyń jaǵdaıy qalaı bolǵany belgisiz. Premer-mınıstr eger de kimde-kim áýege áskerı ushaqtardy nemese tikushaqtardy ruqsatsyz kóteretin bolsa, atyp túsiriletindigin habarlady», - dedi Erjan.
Sondaı-aq, ol Túrkııa Parlamentine de shabýyl jasalyp, 12 adamnyń jaraqat alǵandyǵyn jetkizdi. Óz kezeginde Qazaqstannyń konsýldyǵy Túrkııada júrgen qazaqstandyq stýdentterdi jáne basqa da otandastarymyzdy abaı bolýǵa, ázirge úıden dalǵa shyqpaýǵa shaqyrdy.
«Taǵy bir aıta ketetin jaıt, Rejep Taııp Erdoǵan memlekettik tóńkeris jasalý barysynda Marmarıstegi qonaq úıden shyqqany sol eken, sol qonaq úıge shabýyl jasalǵan. Oǵan eki bomba tústi», - dedi E. Júsip.
