Qazaqstandyq áıelderdi jatyr moıny isigine tegin qaralýǵa shaqyrýda

Instıtýttyń habarlaýynsha, 2017 jyldyń 23-29 qańtary aralyǵynda Qazaqstanda jatyr moıny isigi týraly málimetter berý aptalyǵy ótedi.

«2017 jyly 28 qańtarda Qazaqstanda jatyr moıny isigi týraly málimetter berý aptalyǵy aıasynda pap-synaqtardy alý maqsatynda gınekologııalyq tekserister júrgiziledi. Synaq nıet tanytqan barlyq azamatshalarǵa tegin júrgiziledi. Bul kúnderi elimizdiń barlyq onkologııalyq dıspanserlerinde ashyq esik kúnderi ótedi, onda qyz-kelinshekter gınekolog-onkologtar tegin keńester ala alady. Almatyda ashyq esik kúni 28 qańtarda 9.00-den 14.00-ge deıingi ýaqytta Qazaq onkologııa jáne radıologııa ǵylymı-zertteý ınstıtýtyn (Abaı dańǵylynyń Shaǵabýtdınov kóshesimen qıylysynda) jáne Almaty onkologııalyq dıspanserinde (Ótepov kóshesiniń Gagarın kóshesimen qıylysynda) ótedi. Astanada Manas kóshesi, 17-úıde ornalasqan Qalalyq onkologııalyq ortalyqta qabyldaý bolady. óńirlerdegi onkologııalyq dıspanserlerdiń mekenjaıyn turǵylyqty jeri boıynsha emhanalarda surap bile alasyzdar», - delingen Qazaq onkologııa jáne radıologııa ǵylymı-zertteý ınstıtýtynyń habarlamasynda.

Onkologııalyq ınstıtýttyń málimetterinshe, 30-60 jas aralyǵyndaǵy qazaqstandyq áıelder bes jylda bir ret jergilikti emhanalarynda tegin skrınıngten óte alady.

«Pap-synaq jatyr moıny isigin aldyn alýdyń eń tıimdi ádisi. Osy ádistiń negizinde damyǵan elderde jatyr moıny isiginen kóz jumatyn áıelderdiń sanyn esege deıin qysqarta aldy», - dep atap ótedi Qazaq onkologııa jáne radıologııa ǵylymı-zertteý ınstıtýtynyń dırektory Dılıara Qaıdarova.

Degenmen álemde áıelder arasynda qaterli isikten kóz jumatyndardyń jalpy sanynda, jatyr moıny isigi kesirinen baqılyq bolatyndardyń úles sany óte kóp. Bul dert ádette 30-40 jastaǵy jáne odan da eresek áıelderde jıi kezdesedi. 2015 jyly Qazaqstanda 1 826 áıelden jatyr moıny isigi anyqtaldy. 600 kelinshek osy aýrýdan kóz jumdy. Osy dertke shaldyqqandardyń sany 11 578 adamdy qurap otyr.