Qazaqstandyq áıelder 8 naýryzǵa qandaı syılyq alǵysy keledi
ALMATY. QazAqparat - Halyqaralyq áıelder kúni qarsańynda el turǵyndarynyń arasynda saýalnama júrgizildi. Onyń qorytyndysy boıynsha, elimizdegi erler áıelderge qandaı syılyq jasaýdy qolaı kóretinin, sonymen birge názik jandardyń ózderi qandaı syılyq alǵysy keletinin tuspaldap bilýge bolady, dep habarlaıdy QazAqparat tilshisi.
HeadHunter kompanııasynyń zertteý ortalyǵy 8 naýryz qarsańynda «Áıelder qandaı syılyq qalaıdy?» taqyrybynda saýalnama júrgizgen. Saýalnamaǵa 134 adam qatysqan. Saýalnamaǵa qatysqandardyń 88 paıyzy - áıelder.
Saýalnamaǵa qatysýshylardyń oıynsha, zergerlik buıymdar men gúlder - kóktemniń shýaqty merekesinde suranysqa ıe syılyq bolyp shyqty. Sonymen birge, kóp tartý etiletin syılyqtardyń qataryna parfıýmerııalyq kosmetıka, kitap nemese sporttyq dúkenderde saýda jasaýǵa bolatyn sertıfıkat, sonymen birge turmystyq tehnıkalar men aqsha jatady.
Respondentter sonymen qatar, áıelderdiń kınoǵa nemese teatrǵa bılet alýǵa, brendti sómkege, óz qolyńyzdan jasaǵan erekshe syılyqqa, múmkindik bolsa gadjetterge, páter nemese kólikke qushtar ekenin jazǵan.
Saýalnamaǵa qatysýshylardyń pikirine qulaq assaq, paıdasyz sývenır syılyqtarǵa, jasandy gúlderge áıelderdiń jany qas kórinedi. Bul tizimge ydys-aıaq, as úıdiń kerek-jaraǵyn, kámpıtter, tátti-dámdilerdi, kıim, quttyqtaý qaǵaz nemese vannalyq kerek-jaraqty da jatqyzýǵa bolady.
