Qazaqstandyq áıel Taıland aýrýhanasynan elge jetkiziledi - Densaýlyq saqtaý mınıstrligi
Mınıstrliktiń málimetinshe, 2018 jyldyń 4 sáýirinde Taılandta otbasylyq demalysta júrgen 1962 jylǵy Qazaqstan azamatshasy (Temirtaý turǵyny) ınsýlt alyp, Pattaııa qalasynyń aýrýhanasyna jatqyzylǵan.
«Barlyq qajetti medıtsınalyq qujattama alynyp, Respýblıkalyq sanıtarlyq avıatsııa ortalyǵy deńgeıinde komıssııa otyrysy ótti. Osydan soń QR Densaýlyq saqtaý mınıstrligi Syrtqy ister mınıstrligimen birlesip, qajetti medıtsınalyq kómek alýy úshin otandasymyzdy elge jetkizýdi uıymdastyrý protsesi birden bastaldy», - dep atap ótedi vedomstvodan.
Taratylǵan aqparatqa qaraǵanda, naýqas otandasymyzdy elge jetkizý datasy onyń densaýlyǵyna tikeleı baılanysty. Degenmen, osy aıdyń 25-27 kúnderinde ony elge jetkizý josparlanyp otyr. Ol elge jetkizilgennen keıin Astana qalasynyń medıtsınalyq mekemelerinde qajetti kómek alatyn bolady.
«Naýqasty elge jetkizý sanıtarlyq avıatsıanyń arnaıy bortymen júzege asyrylady. Ushaq qajetti medıtsınalyq qural-jabdyqpen jabdyqtalǵan, sanıtarlyq avıatsııa qyzmetiniń utqyr brıgadasy da birge bolady. Qazirgi ýaqytta azamatsha dárigerlerdiń turaqty baqylaýyna alynǵan», - delingen taratylǵan málimette.
Aıta keterligi, osy jyldyń basynda elimizdiń Densaýlyq saqtaý mınıstrligi shetelde densaýlyǵy nasharlap ketken Qazaqstan azamatyn ushaqpen alyp kelgen edi. Naýqastardy elge jetkizýge jumsalǵan barlyq shyǵyndar respýblıkalyq bıýdjet esebinen óteldi.
Illıýstratıvnoe foto s saıta tagfly.ru