Qazaqstandyq áıel Reseıge alyp ketken balasyn qaıtara almaı júr
ASTANA. QazAqparat - QR Syrtqy ister mınıstrligi Reseıde balasynan aıyrylǵan qazaqstandyq áıelge qatysty pikir bildirdi, dep habarlaıdy QazAqparat tilshisi.
«Qazaqstan azamaty Dana Ámeeva ótken jyly balasyn qaıtaryp alýǵa kómek suraǵan bolatyn. Kezinde ol Reseı azamatyna turmysqa shyǵyp, Kalınıngrad qalasyna kóshken. Otbasylyq sebeptermen eki jyldan keıin ajyrasqan jáne Kalınıngrad qalasynyń soty balany anasymen qaldyrý týraly sheshim shyǵarǵan. Alaıda, balanyń ákesi sot sheshimin oryndamaı, Belarýs pen ózge de eýropalyq qalalar arqyly sábıdi alyp ketken», - dedi QR SІM resmı ókili Aıbek Smadııarov Astanada ótken aptalyq brıfıngte.
Onyń aıtýynsha, Sankt-Peterbýrgtegi Qazaqstan Konsýly bul máseleni óz baqylaýynda ustap otyr. Olar birneshe ret Reseıdiń quqyq qorǵaý jáne sot organdaryna júginip, sot sheshiminiń oryndalýyn talap etken. Alaıda, jergilikti bılik bala men ákeniń qaıda ekenin bilmegen.
«Ótken aıda áke men balanyń Kalınıngrad qalasyna qaıtyp kelgeni habarlandy. Sýdıa men Dana Ámeeva balany kórýge bardy. Balanyń ákesi sábıge RF azamattyǵyn alyp bergen. Qazaqstan azamattyǵynan shyqpaǵan sábıge Reseı azamattyǵy qalaı berilgen? Sondyqtan, bul ózekti másele boıynsha jumys isteýdi jalǵastyramyz», - dedi Aıbek Smadııarov.
