Qazaqstandyq áıel AQSh-ta 48 shaqyrym qashyqtyqty júzip ótti

NUR-SULTAN. QazAqparat - Qazaqstandyq áıel Ánel Sytdyqova AQSh-ta 48,5 shaqyrym qashyqtyqty júzip ótti, dep habarlaıdy QazAqparat tilshisi.

BQO dene shynyqtyrý jáne sport basqarmasynyń basshysy Qaımen Esendııarovtyń málim etkenindeı, qazaqtyń temir hanshaıymy atanǵan Ánel Nıý-Iork qalasynda Manhetten araly aınalasynda 28,5 mıl (48,5 km) qashyqtyqty toqtamastan júzip ótken.

Júzý úsh ózen, sonyń ishinde Gýdzon arqyly ótedi. Sondaı-aq 20 kópirdiń kópshiligi Manhetten men Bronks aralyǵynda ornalasqan.

Batys Qazaqstan oblysynda týyp-ósken Ánel Sytdyqova budan úsh jyl buryn La-Mansh buǵazyn (38 shaqyrym) toqtamastan 15 saǵat 15 mınýtta júzip ótken edi.

«Qazirgi kezde qyzym balalary Oksfordta oqyp jatqandyqtan, kúıeýbalam Nurlanmen birge sonda turyp jatyr», -dedi QazAqparat tilshisine Áneldiń ákesi Álibek Sytdyqov.

Eske sala keteıik, budan buryn Á.Sytdyqovanyń AQSh-ta taǵy osyndaı eki uzaq qashyqtyqty júzip ótkisi keletini týraly jazǵan bolatynbyz.

Sondaı-aq La-Manshty júzip ótken qazaqstandyq áıelge qos birdeı marapat tabys etildi.