Qazaqstandyq avtorlardyń qoıylymdary úsh esege deıin ulǵaıady - Mádenıet mınıstrligi
Mádenıet jáne sport mınıstrligi Qazaqstannyń 2023-2029 jyldarǵa arnalǵan mádenı saıasatyn damytý tujyrymdamasyn usyndy. Qujatta otandyq teatrlarǵa erekshe kóńil bólingen. Nysanaly ındıkatorlardyń biri - qazaqstandyq avtorlardyń qoıylymdaryn úsh ese ulǵaıtý.
2029 jylǵa qaraı jyl saıyn qazaqstandyq avtorlardyń 600 spektakli sahnalanbaq. Qoıylymdar sanynyń artýy kezeń-kezeńimen júzege asady. Mysaly, bıyl 245 spektakl qoıý mindeti tur, bul ótken jylmen salystyrǵanda 62 qoıylymǵa artyq.
Tujyrymdama, sonymen qatar ınklıýzıvti toptyń balalary úshin teatr trýppalaryn ashýdy, erekshe qajettilikteri bar adamdarǵa spektaklderdiń onlaın-kórsetilimderin uıymdastyrýdy, jańa teatrlar salýdy jáne jas talanttardy memlekettik qoldaý sharalaryn odan ári iske asyrýdy kózdeıdi.
«Elimizdiń teatr ónerin damytý - aldaǵy birneshe jyldaǵy basty mindetterimizdiń biri. Teatr bizdiń azamattarymyzǵa barynsha qoljetimdi bolýy tıis. Bul tek kórermender úshin ǵana emes, sonymen qatar jas talantty dramatýrgter úshin de kerek. Jańa avtorlarsyz damý múmkin emes, sondyqtan bizdiń mınıstrlik jańa esimderdi tanytýǵa erekshe nazar aýdarady. Máselen, ótken jyly ádebıet salasyndaǵy «Aıboz» tuńǵysh ulttyq syılyǵy tabys etildi. Bıyl qazaqstandyq jas jazýshylar men aqyndarǵa arnalǵan Prezıdenttik ádebı syılyq tabystalady», – dedi Mádenıet jáne sport vıtse – mınıstri Nurǵısa Dáýeshov.
