Qazaqstandyq avtoóndirýshiler 9 aıda 21 myńnan astam jeńil kólik shyǵardy
ASTANA. QazAqparat - Osy jyldyń qańtar-qyrkúıek aılarynda Qazaqstanda jeńil avtokólikterdiń óndirisi ótken jylmen salystyrǵanda 83,4 paıyzǵa artqan, dep habarlaıdy QazAqparat tilshisi Qazaqstan avtobıznes qaýymdastyǵynyń baspasóz qyzmetine silteme jasap.
Otandyq avtoóndirýshilerdiń tamyz aıynda qarqyny báseńdegenimen, qyrkúıekte jumysy qaıta jandanyp, 3244 tehnıkany (tamyzdan qaraǵanda 1025-ke artyq) jasap shyǵarǵan.
Qazaqstan avtobıznes qaýymdastyǵynyń málimetine súıensek, 2018 jyldyń 9 aıynyń ishinde barlyq tıp boıynsha 22 709 kólik quraly qurastyrylǵan. Bul kórsetkish 2017 jyldyń qańtar-qyrkúıek aılarymen salystyrǵanda 71 paıyzǵa artyq. Ol kezde Qazaqstan boıynsha 13 312 dana kólik qurastyrylyp shyǵarylǵan edi. Negizinen ósim jeńil avokólikterdiń enshisinde boldy.
«Bıyl 21 137 jeńil avtokólik (+83%), 802 aýyr júk kóligi (-17%), 388 tirkeme men jartylaı tirkeme (+131%), 231 avtobýs (-48%) jáne 151 ózge de arnaıy tehnıkalar (+0%) shyǵarylǵan. Aldyn ala málimet boıynsha, qostanaılyq «SaryarkaAvtoProm» kompanııasynyń ósimi 109 paıyzdy kórsetip otyr. Atalmysh kompanııa 9 aıdyń ishinde 7 941 dana jeńil avtokólik, aýyr júk kóligi men avtobýs qurastyrǵan. Óskemendik «Azııa Avtonyń» enshisinde - 13 365 avto (+64%). Al kókshetaýlyń «KAMAZ Injınırıng» 440 aýyr júk kóligin, semeılik SemAZ 206 aýyr júk kóligin, almatylyq Hyundai Trans Auto 188 tehnıka shyǵarsa, Daewoo Bus esebinde -106 avtobýs», - delingen habarlamada.
Eske sala ketsek, budan buryn Qazaqstan avtobıznes qaýymdastyǵy avtobýs, kombaın men traktorlardy shyǵarý úshin 26 mlrd teńge bólingeli otyrǵany habarlanǵan bolatyn.
