Qazaqstandyq avtobıznes qaýymdastyǵy avtonesıeleý kezinde bastapqy salymdy eski kólik esebinen tóleýdi usyndy
ASTANA. QazAqparat - Qazaqstandyq avtobıznes qaýymdastyǵy jeńildikti nesıeleý kezinde bastapqy salymdy eski avtokólik esebinen tóleý praktıkasyn engizýdi usyndy, dep málimdedi QABQ-da.
«Bastapqy salymdy eski avtokólik esebinen tóleý praktıkasy bizdiń azamattarymyzdyń múmkindikterin aıtarlyqtaı keńeıtetinine senimdimin. Sebebi, bastapqy salymdy jınaý qajettigi bolmaıdy. Jeńildikti 4% nesıemen birge bul jaqsy sheshim bolyp, adamdarǵa aqsha únemdeýge múmkindik beredi», - dedi QABQ prezıdenti Andreı Lavrentev.
Salalyq uıymda túsindirip ótkendeı, eski kólikti «SBJ operatoryna» tapsyrý kezinde qazaqstandyqtarǵa bastapqy salymdardy jabý úshin ótemaqy sertıfıkattary beriledi.
«Osy jáne basqa da birneshe usynys Investıtsııalar jáne damý mınıstrliginiń qaraýynda jatyr. Olar maquldanady degen senimdemiz. Retteýshi qaıtken kúnde de qazaqstandyqtar úshin yńǵaıly sheshim qabyldaıdy dep esepteımiz», - dep atap ótti QABQ basshysy.
Daǵdarys kezinde qazaqstandyqtarǵa qoldaý kórsetý maqsatynda QABQ otandyq avtokólik satyp alýdy jeńildikti nesıeleý baǵdarlamasyn damytýǵa usynys jasady, dep jazady primeminister.kz.
Esterińizge salsaq, Jeńildikti nesıeleý memlekettik baǵdarlamasy jylyna 4%-ben, kólik qunynan 20% deıin bastapqy salymmen qazaqstandyq óndiristegi kommertsııalyq jáne jolaýshylar avtokólikterin satyp alýǵa múmkindik beredi. Baǵdarlama 20 jylǵa eseptelgen jáne «jańartpaly nesıeleý» negizinde júzege asyrylady: nesıe alǵan jeke tulǵalardyń negizgi qaryzyn óteýden túsetin qarajat esebinen bankter avtokólikter satyp alýǵa jańa qaryzdar beredi.
Qazaqstandyq avtobıznes qaýymdastyǵy - 2010 jyly QR avtokólik naryǵyndaǵy óndirýshilerdiń, resmı deldaldardyń, ımporttaýshylardyń, dıstrıbıýtorlardyń erkin birlestigi retinde qurylǵan kommertsııalyq emes uıym.
