Qazaqstandyq avtoáýesqoılar JQE boıynsha aldyn ala emtıhan tapsyrý múmkindigine ıe boldy
ASTANA. QazAqparat - Avtoáýesqoılar mamandandyrylǵan HQKO-larda jol qozǵalysynyń teorııasy boıynsha aldyn ala test tapsyra alady, dep málimdedi «Azamattarǵa arnalǵan úkimet» memlekettik korporatsııasy.
«Azamattarǵa arnalǵan úkimet» memlekettik korporatsııasynyń basqarma tóraǵasynyń orynbasary Ǵalym Nurǵazıevtiń aıtýynsha, endi azamattar emtıhan aldynda ózderiniń bilimin mamandandyrylǵan halyqqa qyzmet kórsetý ortalyqtarynda (HQKO) teksere alady.
«Memlekettik korporatsııa jol qozǵalysynyń teorııasy boıynsha aldyn ala testileý jobasyn iske qosty. Endi árbir úmitker emtıhan tapsyrar aldynda jol qozǵalysy erejeleri boıynsha óziniń bilimin synaı alady. Mundaı qyzmet mamandandyrylǵan HQKO-larda aqyly negizde kórsetiledi. Astana jáne Almaty turǵyndary úshin 700 teńgeni, oblys ortalyqtarynda 500 teńgeni quraıdy», - dedi Ǵ.Nurǵazıev.
Birinshi ret júrgizýshi kýáligin alarda úmitker eki emtıhan - 40 suraqtan turatyn teorııalyq emtıhan jáne avtodromda 12 jattyǵýdan turatyn praktıkalyq emtıhan tapsyratynyn aıta ketken jón. Árbir úmitkerde 3 retke deıin emtıhan tapsyrýǵa múmkindik bar. Úsh ret synnan óte almasa, úmitkerge kelesi emtıhan tapsyrýǵa sońǵy emtıhan ótken kúnnen bastap alty aıdan keıin ruqsat beriledi.
Aıta ketetin másele, bolashaq júrgizýshiler ıntellektýaldy avtodromda praktıkalyq daǵdylaryn synaı alady. «Avtomattandyrylǵan elektrondy alańda praktıkalyq emtıhan tapsyrýǵa emtıhan aldy daıyndyqty júrgizý» aqyly qyzmeti qazaqstandyqtarǵa aptasyna jeti kúnde de kórsetiledi.
Azamattarǵa júrgizýshi kýáligin alý rásimderin jeńildetetin ózgerister kólik quraldaryn tirkeý jáne esepke alý qaǵıdasyn bekitý týraly buıryqqa osy jyldyń maýsym aıynyń basynda engizilgen. Jańa qaǵıdalarǵa sáıkes «A» jáne «V» sanatyndaǵy, sondaı-aq «A1» jáne «V1» kishi sanatyndaǵy júrgizýshi kýálikterin avtomektepterde oqymaı-aq alýǵa bolady.
Qazirgi tańda aqyly qyzmetter Astana, Almaty, Qaraǵandy, Taraz, Aqtaý, Petropavl, Qyzylorda, Taldyqorǵan, Qostanaı jáne Aqtóbe qalalarynda 10 mamandandyrylǵan halyqqa qyzmet kórsetý ortalyqtarynda kórsetiledi. Jyldyń basynan beri 5 myńnan asa qazaqstandyqtar avtomattandyrylǵan avtodromda avtokólik júrgizý qyzmetterin paıdalanǵan.
