Qazaqstandyq aýyr atletter Rıo Olımpıadasynda joǵary deńgeıde óner kórsetti - A. Nı
ALMATY. QazAqparat - Aýyr atletıkadan Qazaqstan qurama komandasy Rıo Olımpıadasynda joǵary deńgeıde óner kórsetti. Búgin komandamen birge Almatyǵa oralǵan, aýyr atletıkadan Qazaqstan qurama komandasynyń bas bapkeri Alekseı Nı áýejaıda jýrnalısterge bergen suhbatynda osylaı dedi.
Onyń aıtýynsha, Olımpıadada árbir medal - qajyrly eńbektiń jemisi.
«Rıo Olımpıadasynda barlyǵy 8 atletimiz óner kórsetti. Qorjynǵa 5 medal tústi. Eki atlet tórtinshi oryn, al bir atlet besinshi oryn aldy. Bul Olımpıadada ekinshi quram óner kórsetti dese de bolady. Bes atlet Olımpıada tuǵyryna birinshi ret kóterilip otyr. Osy jáıtterdi eskerer bolsaq, komandany joǵary dárejede óner kórsetti deýge ábden bolady», - dedi A. Nı.
Sonymen qatar, Alekseı Nı Jazıra Japparqulǵa Olımpıada chempıony atanýyna ózine degen senimdilik jetispegenin aıtty.
«Jazıraǵa qytaılyq qarsylasyn jeńe alatyndyǵyna degen senimdilik jetispedi. Onyń ústine, julqa kóterýden ekinshi oryn alǵan soń, bosańsyp qaldy. Úshinshi múmkindikten aıyrylmaý kerek edi. Serpe kóterýde birinshi múmkindikti sátsiz aıaqtady. 140 kelini kóterý kerek edi. Ekinshi múmkindikte - 144, al úshinshi múmkindikte 147 kelini kóterý kerek bolatyn. 147 kelini kóterý - Olımpıada chempıony bolý degen sóz. Qytaılyq qarsylasy 145 keliden ári asa almas edi. Bar múmkindigi sol bolatyn. Ózderińiz de kórdińizder ǵoı, ol úshinshi múmkindigin sátsiz aıaqtady. Jazıraǵa bir múmkindik jetispedi. Eger, ol 147 kelini kótergende qytaılyq atlet 148-di kótere almas edi. Jazıraǵa jeńimpazdyq rýh, tájirıbe, salqynqandylyq jetispedi. Biraq, eń bastysy Jazıra qytaılyq qarsylasyn jeńýge bolatyndyǵyn sezdi. Al bul, baǵa jetpes tájirıbe. Al tájirıbe - senimdilik kepili», - dedi A. Nı.
Budan basqa, aýyr atletıkadan Qazaqstan quramasynyń bas bapkeri
basqa da atletterimizdiń ónerine baǵa berdi.
«Karına Gorıcheva joǵary dárejedegi halyqaralyq jarystarǵa qatysyp kórmegen atlet. Olımpıadaǵa birinshi ret qatysyp, úshinshi orynǵa kóterildi. Bul jaqsy jetistik. Mundaı dúbirli doda Karınanyń ózine degen senimdiligin arttyra túsedi. Al, Farhad Harkı kezinde Álem birinshiliginde 14-shi oryndy ıelengen. Soǵan qaramastan Olımpıadada qola júldege ıe boldy. Bul da jetistik. Margarıta Elıseevaǵa keler bolsaq, ol óz salmaǵynda jeńiske jetýi tıis edi. Biraq tájirıbe jetispedi. Bir sózben aıtqanda psıhologııalyq turǵyda «janyp ketti».
Al Zaıchıkovtyń múmkindigin qabyldaýǵa bolatyn edi. Átteń, qazylar alqasy qabyldamaı tastady. Bizge ádeıi qııanat jasady. Altyn medaldy bergisi kelmedi», - dedi Alekseı Nı.
Aıta ketelik, búgin Ońtústik astananyń Halyqaralyq áýejaıynyń VIP-termınalynyń aldynda ziltemir kóterýden 77 kelige deıingi salmaq dárejesinde Rıo Olımpıadasynyń chempıony 23 jastaǵy Nıjat Rahımovty, kúmis júldeger 22 jastaǵy Jazıra Japparquldy (69 kelige deıingi salmaq), qola júldegerler: 23 jastaǵy Karına Gorıcheva (63 kelige deıingi salmaq) men 25 jastaǵy Farhad Harkıdi (62 kelige deıingi salmaq), sondaı-aq, besinshi oryn alǵan 24 jastaǵy Margarıta Elıseeva (48 keli) men 4-shi oryn alǵan 24 jastaǵy Chonteı Arlıdi (56 keli) sport salasyndaǵy uıymdardyń ókilderi, ziltemirshilerdiń týǵan-týystary, týǵan óńirlerinen kelgen delegatsııalar, jas sportshylar, qala turǵyndary - barlyǵy 300-den astam adam zor qýanyshpen qarsy aldy.
