Qazaqstandyq aýyr atletter álem chempıonatynda taǵy eki altyn medal jeńip aldy
NUR-SULTAN. QazAqparat – Qazaqstandyq sportshylar Meksıkanyń Leon qalasynda aýyr atletıkadan jasóspirimder arasynda ótip jatqan álem chempıonatynda taǵy eki altyn medal jeńip aldy, dep habarlaıdy QazAqparat tilshisi.
Qazaqstan aýyr atletıka federatsııasynan málim etkendeı, elordalyq 17 jastaǵy Edige Emberdi 73 kelige deıingi salmaqta úzdik shyqty.
Julqa kóterýden 134 kelini eńsergen Edige birden alǵa ketti. Al serpe kóterýden 172 kelini baǵyndyryp, álemdik rekord jasady. Qossaıys qorytyndysynda qalǵan atletterden qara úzip ketti – 306 kg.
Ózbekstandyq Dıorbek Ermatov 290 kelimen (133+157) ekinshi, kanadalyq Braıan Ibanez Gerrero 288 kelimen (132+156) úshinshi orynǵa kóterildi.
Taǵy bir qazaqstandyq Denıs Polýboıarınov 81 kelige deıingi salmaqta chempıon atandy. Ol qossaıys qorytyndysynda 323 kg (143+180) nátıje kórsetti. Italııalyq ıAkopo Falsınottı 293 kelimen (132+161) kúmis, meksıkalyq Iaan Barreras 280 kelimen (119+161) qola júldeni qanaǵat tutty.
Osylaısha, Qazaqstan quramasy altyn medal sanyn úshke jetkizdi.
Eske sala keteıik, budan buryn aýyr atlet Erasyl Sáýlebekovtiń jasóspirimder arasynda álem chempıony atanǵanyn jazǵan bolatynbyz.
