Qazaqstandyq aýyr atletshi Nadejda Nogaı ıýnıorlar arasynda álem chempıony boldy
ASTANA. 14 sáýir. QazAqparat - Qazaqstandyq Nadejda Nogaı aýyr atletıkadan ıýnıorlar arasynda álem chempıony boldy, jarys Tashkent qalasynda ótti.
Bul týraly Vesti.kz habarlady.
69 keliden astam salmaq dárejesinde Nogaı Ýkraına sportshysy Irına Dehýdi (232) jáne qytaılyq Van Sıtszındi (212) artta qaldyryp, eń jaqsy nátıje - 241 kelini kórsetti. Osy salmaqta besinshi oryndy Qazaqstannyń taǵy bir aýyr atletshisi Tatıana Kapýstına ıelendi (204 keli).
Sondaı-aq júldege 94 keliden astam salmaq dárejesinde óner kórsetken qazaqstandyq Zelimhan Ábýbákirov qol jetkizdi. Qazaqstandyq eki jattyǵýdyń nátıjesinde barlyǵy 351 kelini kóterip, úshinshi boldy. Álem chempıony Armenııa sportshysy Sımon Martırosıan atandy (365), ekinshi oryn ırandyq Alıreza Sýleımanıge buıyrdy (358 keli).
