Qazaqstandyq aýyr atlet Álem chempıonatynda ekinshi orynǵa shyqty
ASTANA. QazAqparat - Túrikmenstan astanasy Ashhabadta ótip jatqan aýyr atletıkadan 2018 jylǵy Álem chempıonynda Aleksandra Aborneva óz tobynda ekinshi orynǵa shyqty, dep habarlaıdy Sports.kz.
S tobynda 87 kılogramnan aýyr salmaq jarysyna Qazaqstannan Aızada Múptilda men Aleksandra Aborneva qatysty.
Julqı kóterýden Aızada ekinshi (108 kg), Aleksandra úshinshi (105 kg) nátıje kórsetti. Serpe kóterýden Aızada 130 kg, al Aborneva 135 kg ziltemirdi baǵyndyrdy. Osylaısha, Aborneva qorytyndy esep boıynsha ekinshi (240 kg), al Múptilda tórtinshi (238 kg) orynǵa turaqtady. S tobyndaǵy jalpy esepte brıtanııalyq Emılı Djeıd Kembell 248 kg nátıjemen kóshbasshy boldy.
Eske sala keteıik, buǵan deıin erler arasynda Arlı Chonteı (55 kg) kúmis, áıelder arasynda Nadejda Lıhacheva (71 kg) qola medal alǵan bolatyn. Zýlfııa Chınshanlo (55 kg) besinshi nátıjemen shekteldi.
Ashhabadtaǵy Álem chempıonaty 10 qarashaǵa deıin jalǵasady. Jalpy, Qazaqstan namysyn bıylǵy dodada 20 sportshy qorǵap júr.
