Qazaqstandyq Aýǵan soǵysynyń ardagerleri Máskeýde medıtsınalyq tekserýden ótti

MÁSKEÝ. QazAqparat – Aýǵan soǵysyna qatysqan eki qazaqstandyq ardager medıtsınalyq tekserýden ótip, Máskeýdiń jetekshi emhanalarynda em qabyldady, dep habarlaıdy QazAqparat.

Reseı astanasyna kelgen aýǵan soǵysynyń ardagerleri Kenjebaı Ámirov pen Bekbolat Erenovtiń aıtýynsha, Aýǵanstanda Sovet kontıngenti quramynda bolǵan kezde olar jarylǵan mınadan jaraqat alǵan, sonyń saldarynan kórý qabiletterinen aıyrylǵan.

«1988 jyly biz brıgadamyzdy Qandaǵar qalasynyń ońtústik bóliginen shyǵarý úshin áskerı operatsııaǵa qatystyq. 2 tamyz kúni mına jarylyp, men kórý qabiletinen aıryldym», - deıdi Pavlodardan kelgen K.Ámirov.

Ol Qazaqstannyń ardagerler uıymdarymen jáne jergilikti organdardyń ókilderimen únemi baılanysta bolatyndyǵyn, olar máselelerdi sheshýge barynsha kómek kórsetýge tyrysatyndyǵyn atap ótti.

«Qazaqstannyń Reseıdegi elshiligi bizdiń Máskeýde tekserýden ótýimizge qoldaý kórsetti. Bizdi ushaqtan qarsy aldy, ornalastyrdy jáne Fedorov atyndaǵy oftalmologııa ınstıtýtyna ertip, barlyǵyn uıymdastyryp júrdi. Ol jerde men barlyq qajetti tekserýden óttim. Olar meniń ekinshi kózime kosmetıkalyq protezdik lınza taǵyp berdi», - deıdi ardager.

«Árıne, dárigerler kórý qabiletin qalypna keltire almaıdy, biraq bolashaqta qajetti tehnologııalar bolǵan kezde olar muny jasaýy múmkin», - dedi K. Ámirov.

Aqtóben kelgen taǵy bir ardager Bekbolat Erenovtyń aıtýynsha, qaıǵyly oqıǵa 1987 jyldyń kúzinde, onyń otrıady Panjsher shatqalyna túsip jatqanda bolǵan. «Meniń aldymdaǵy soldatty mına jaryp jiberdi, men de aýyr jaraqat aldym. Aıaǵym men kórý qabiletimnen aıyryldym. Osydan keıin uzaq ýaqyt Kabýlda, Tashkentte jáne Qyrymda ońaltý ortalyqtarynda boldym», - deıdi ol.

«Jaqynda bizge elshilikten habarlasty. Biz Máskeýge áıelimmen birge kelip, birden dárigerge bardyq. Mamandar qarap, protezdi aýystyrdy. Men ózimdi jaqsy sezinemin, aýyrsyný joq», - deıdi B. Erenov.

Ardagerler Aýǵanstandaǵy Sovet áskerleriniń mıssııasyna qatysqany úshin áskerı nagradalar alǵanyn aıtty. Sol úshin olar sársenbi kúni Reseıdegi Qazaqstan elshiliginde ótken aýǵan áskerlerin marapattaýǵa arnalǵan saltanatty sharaǵa qatysty.

Olar Máskeýge barý úshin qarajat bólgen ákimdikterge, sondaı-aq qazaqstandyq ardagerler uıymdarynyń belsendilerine aýǵan áskerleri arasyndaǵy baılanysty saqtap qalǵany úshin alǵys bildirdi.

«Qazaqstan elshiliginiń atsalysýynyń nátıjesinde biz Máskeýge kelip, tekserýden ótip, em qabyldadyq. Kúndiz-túni janymyzda birge júrgen dıpmısııa qyzmetkerlerine de alǵysymyz sheksiz», - dep sózin túıindedi B. Erenov.

Avtory Narymbek Ysmaǵulov