Qazaqstandyq áýekompanııalar Saýd Arabııasyna eki turaqty reıs ashýdy josparlap otyr

NUR-SULTAN. QazAqparat - Qazaqstandyq áýekompanııalar Saýd Arabııaǵa turaqty reısterdi oryndaý úshin sertıfıkattaýdan ótýde, dep habarlaıdy QazAqparat QR IIDM Azamattyq avıatsııa komıtetine silteme jasap.

«Eır Astana» áýekompanııasy Almaty – Medına jáne Almaty – Jıddá baǵyty boıynsha aptasyna 2 reıs jıilikpen turaqty reısterdi oryndaýdy josparlap otyr. Qazirgi ýaqytta kompanııa atalǵan reısterdi oryndaýǵa ruqsat alý úshin qujattardy tapsyrdy. Tıisti ruqsat alǵannan keıin áýekompanııa osy reısterdi oryndaýdy 2019 jyldyń sońyna deıin bastaýǵa daıyn. Óz kezeginde, «SCAT» áýe kompanııasy Almaty – Jıddá (sársenbi) jáne Almaty – Medına (senbi) baǵyttary boıynsha ushýlardy oryndaýdy 2019 jyldyń jeltoqsan aıynan bastap Boeing-757 tıpti áýe kemesinde bastaýdy josparlap otyr. Qazirgi ýaqytta kompanııa Saýd Arabııa Koroldiginde sertıfıkattaý rásiminen ótip jatyr. «Qazaqstan Respýblıkasy men Saýd Arabııa Koroldiginiń avıatsııalyq bılik oryndary arasyndaǵy qoldanystaǵy kelisimge sáıkes, eki taraptyń taǵaıyndalǵan áýekompanııalary ár taraptan elder arasynda aptasyna 4 jolaýshy jáne 3 turaqty júk tasymaldaý reısterin oryndaýǵa quqyly. Saýd Arabııa tasymaldaýshylary úshin ruqsat etilgen qalalar – Nur-sultan, Almaty, Shymkent jáne Qaraǵandy, al qazaqstandyq tasymaldaýshylar úshin Er-Rııad, Jıddá, Medına jáne Dammam», delingen habarlamada. Aıta keterligi, Qazaqstandyq «SCAT» áýekomanııasy 2016 jyldan bastap qajylyq maýsymy kezeńinde qazaqstandyq qajylardy tasymaldaý boıynsha Saýd Arabııasyna reısterdi oryndaıdy, alaıda bul baǵyttar turaqty emes. Arabtar tarapynan qazaqstandyq qajylardy tasymaldaý reısterin «Fly Nas» áýe kompanııasy júzege asyrady.