Qazaqstandyq áýe jelileriniń jolaýshylary qandaı qyzmetterdi alýǵa quqyly
NUR-SULTAN. QazAqparat – QR Indýstrııa jáne ınfraqurylymdyq damý mınıstrliginiń mamandary ózge elderde reıster keshikken jaǵdaıda qazaqstandyq jolaýshylar qandaı qyzmetterdi alýǵa quqyly ekenin túsindirdi, dep habarlaıdy QazAqparat tilshisi.
«Qazaqstan Respýblıkasy men Reseı Federatsııasynyń Úkimetteri arasyndaǵy áýe qarym-qatynastary týraly Kelisimniń 8-baby 2-bóligine sáıkes, ózara kelisken memleketterdiń biriniń zańdary men erejeleri (ushaqtyń kelýin, ketýin, bagaj ben júkti poshtany, sondaı-pasporttyq, kedendik, valıýtalyq jáne sanıtarlyq erejelerge qatysty rásimderdi retteıtin) kelisken ekinshi eldiń aýmaǵynda áýe kásipornynyń ekıpajy, jolaýshylary, bagajy, júkteri úshin qoldanylatyn bolady», - delingen redaktsııanyń resmı saýalyna bergen jaýabynda mınıstrlik mamandary.
Mysaly, Reseı Federatsııasynyń aýmaǵynda qazaqstandyq áýe kompanııasynyń reısi keshigetin bolsa ol jerde Reseı Federatsııasynyń zańnamasy qoldanylady.
Qazaqstan Respýblıkasynyń áýe keńistigin paıdalaný týraly jáne avıatsııa salasy Zańynyń 86-babyna sáıkes, tasymaldaýshynyń kesirinen reıs keshigetin jaǵdaıda ushý pýnkteri men aralyq pýnkterde jolaýshylarǵa kelesi qyzmetter usynylýy kerek:
• reısti kútý kezinde tórt saǵat jáne odan da uzaq ýaqyt ystyq tamaq: ár alty saǵat saıyn – kúndizgi ýaqytta, ár segiz saǵat saıyn – túngi ýaqytta;
• tasymaldaýshy usynatyn qonaq úıden oryn, kúndizgi ýaqytta segiz saǵat, túngi ýaqytta alty saǵat;
• tasymaldaýshy usynatyn kólikpen jetkizý qyzmeti (áýejaıdan qonaq úıge deıin jáne keri baǵytta);
Sonymen qatar, reıs keshikken jaǵdaıda kelesi qyzmetter qarastyrylǵan:
• jeti jasqa deıingi balasy bar ana úshin analar men balalar bólmesi;
• telefonmen eki ret qońyraý shalý (halyqaralyq jeli boıynsha), qońyraý arqyly sóılesý ýaqyty 5 mınýttan kem bolmaýy kerek nemese jolaýshy elektrondy poshta arqyly eki ret habarlama jibere alady.
Joǵaryda atalǵan qyzmetterdiń barlyǵy da aqysyz kórsetilýi tıis. Sonymen birge, eger tasymaldaýshynyń kinásinen reıs on saǵattan artyq ýaqyt keshikken jaǵdaıda tasymaldaýshy myna qyzmetterdi usynýǵa mindetti:
• jaqyn aradaǵy reıs arqyly jolaýshyny bılette kórsetilgen belgilengen pýnktke jetkizý;
• jolaýshyǵa bılettiń tolyq qunyn qaıtarý.
Eske sala ketsek, FlyArystan áýe kompanııasynyń Oral-Almaty baǵytyndaǵy ushaǵy áýe kemesiniń júıesin tekserý saldarynan 13 saǵat keshiktirilgen bolatyn.
