Qazaqstandyq áýe tasymaldaýshy Ortalyq Azııanyń eń úzdigi tanyldy
ASTANA. 19 maýsym. QazAqparat - 2013 jylǵy 18 maýsymda Le-Býrjedegi mereıtoılyq Parıj avıashoýynyń aıasynda ótken Skytrax 2013 World Airline Awards syılyǵy barysynda «Ortalyq Azııadaǵy jáne Úndi eli boıynsha eń úzdik avıakompanııa» dep «Eır Astana» tanyldy. Sonymen birge, ulttyq avıatasymaldaýshy «Ortalyq Azııadaǵy jáne Úndi eli boıynsha eń úzdik qyzmet usynýshy» syılyǵymen de marapattaldy. Bul týraly QR KKM baspasóz qyzmetinen habarlandy.
Skytrax reıtıngilik agenttiginiń World Airline Awards halyqaralyq táýelsiz syılyǵy búkil álemdik avıakompanııalar úshin jolaýshylardyń qanaǵattaný deńgeıin anyqtaıtyn negizgi ólsheý quraly bolyp tabylady. Zertteý júrgizý ádisi týrıster jáne kásipkerler sekildi túrli sanattaǵy jolaýshylardyń bergen baǵasy negizindegi taldaý jumystarynyń nátıjesinde jasalady.
Skytrax reıtıngilik agenttiginiń 10 aı boıyna júrgizgen saýalnamasyna álemniń barlyq elderindegi jolaýshylar qatysty. Avıakompanııalar qyzmetiniń sapasyn baǵalaý jerde jáne bort ishinde qyzmet kórsetý, jolaýshylardy tirkeý, áýe kemesi salonynyń jaılylyǵy, borttyq tamaqtaný, bort serikteriniń qyzmet kórsetýi sekildi 40 túrli krıterıı boıynsha júrgizildi. Zertteý jumystaryna shaǵyn óńiraralyq tasymaldaýshydan bastap iri halyqaralyq tasymaldaýshyǵa deıin, jalpy sany 200-den astam avıakompanııa qatysty.
