Qazaqstandyq áýe tasymaldaýshy kompanııalar memlekettik tilge áli de nemquraıly qaraıdy - Prokýratýra
ASTANA. 24 maýsym. QazAqparat /Qanat Mámetqazyuly/ - Bas kólik prokýratýrasynyń tapsyrmasyn oryndaý maqsatynda Astana qalasynyń Áýe kólik prokýratýrasy áýe kóliginde Qazaqstan Respýblıkasynyń til týraly zańnamasynyń qoldanylýyna taldaý júrgizdi.
Taldaý barysynda Astana qalasynyń halyqaralyq áýejaıy arqyly kúndelikti avıareısterdi oryndaıtyn «SCAT» jáne «Jetysý» avıakompanııasynyń bılet úlgilerine taldaý jasaldy. Bul týraly Bas prokýratýranyń baspasóz qyzmetinen habarlandy.
«Memlekettik til Ata Zańymyzben belgilengen, ony damytý memleketimizdiń qazirgi tańdaǵy eń ózekti máseleleriniń biri. Áıtse de otandyq áýe tasymaldaýshy kompanııalardy tekserý barysynda anyqtalǵan zań buzýshylyqta olardyń bul iske áli de bolsa nemquraıly qarap otyrǵanyn kórsetedi. Zań buzýshylyqtardy joıý úshin avıakompanııalardyń basshylary atyna prokýratýra zańnyń buzylýyn joıý týraly usynystar engizdi», - delingen baspasóz aıǵaǵynda.
Toqtala ketetin jaıt, prokýrorlar júrgizgen taldaý nátıjesinde joǵaryda atalǵan áýe tasymaldaýshylarda memlekettik tildi qoldaný deńgeıi qarastyrylyp, birqatar olqylyqtar anyqtalǵan. Máselen, jolaýshylarǵa usynylatyn bıletterde «Qazaqstan Respýblıkasyndaǵy til týraly» Qazaqstan Respýblıkasy Zańynyń talaptarynyń buzylýy anyqtaldy. «Atap aıtqanda «SCAT» avıakompanııasynyń bıletinde aýdarmadan óreskel sáıkessizdikter ketken. Sóılemder durys aýdarylyp, durys jazylmaǵan ári sóılemniń ózinde grammatıkalyq qateler oryn alǵan», - delingen baspasóz qyzmeti taratqan aqparatta.
