Qazaqstandyq áýe kompanııasy Azııalyq Abacus brondaý júıesine qosyldy
ALMATY. 15 qyrkúıek. QazAqparat /Erbol Azanbek/ - Azııadaǵy áýe kompanııalary úshin qyzmet kórsetýmen aınalysatyn Abacus International Pte Ltd kompanııasy Qazaqstandyq SCAT áýe kompanııasymen áriptestik ornatty. Búgin eki kompanııa basshylary Almatyda arnaıy kelisimge qol qoıdy.
Kelisimge oraı Abacus-tyń brondaý júıesin paıdalanatyn týrıstik agenttikter SCAT áýe kompanııasynyń búkil reısteri men tarıfi týraly aqparatty alý múmkindigine ıe boldy. Bul qyzmet olar úshin tegin. «Biz úshin Abacus brondaý júıesine qosylý seriktester men tutynýshylar sanyn ulǵaıtýǵa múmkindik beredi», deıdi SCAT áýe kompanııasynyń prezıdenti Vladımır Denısov.
Úsh jylǵa bekitilgen mámile bıylǵy jyldyń 4-shi toqsanynda kúshine enedi.
QazAqparat anyqtamasy: Abacus International Pte Ltd shtab páteri Sıngapýrda ornalasqan. 24 eldiń 20 myńnan astam agentikterine áýe, týrızm bıznesi boıynsha brondaý, aqparat berý qyzmetin kórsetedi. Fılıppın eliniń Philippine Airlines, Qytaıdyń China Airlins, Malaızııanyń Malaysia Airlins, Sıngapýrdyń Singapore Airlins syndy iri áýe kompanııalarymen tyǵyz baılanysta jumys isteıdi.
SCAT áýe kompanııasy 1997 jyly qurylǵan. Bas keńsesi Shymkentte ornalasqan. Negizinen Qazaqstannyń ishki áýe reısterin júzege asyrady. Sondaı-aq Mysyr, Ázirbaıjan, Mońǵolııa, Tájikstan, BAÁ, Ózbekstan, Armenııa, Grýzııa, Reseı men Túrkııaǵa áýe reısteri bar.
