Qazaqstandyq áýe kompanııalaryna Mysyrǵa ushýdy shekteý, týrıstik kompanııalarǵa týrpaketterdi satýdy toqtatý usynyldy
ASTANA. QazAqparat - Azamattyq avıatsııa komıtetinde áýe kompanııalary men týrıstik uıymdardyń qatysýymen ótken jıynda «Kogalymavıa» ushaǵynyń apatyna qatysty tergeýdiń aldyn-ala qorytyndylary belgili bolǵanǵa deıin qazaqstandyq áýe kompanııalaryna Mysyr áýejaılaryna ushýdy shekteý, al týrıstik kompanııalarǵa týrpaketterdi satýdy toqtatý usynysy jasaldy, dep habarlaıdy QR IDM baspasóz qyzmetinen.
Avıatsııalyq qaýipsizdik boıynsha ulttyq erejeler men IKAO-nyń táýekeldi basqarý júıesiniń standartty ádistemesine sáıkes, Azamattyq avıatsııa komıteti Sharm-esh-Sheıh áýejaıyna qatynaıtyn qazaqstandyq áýe kompanııalarynyń ushý qaýipsizdiginiń deńgeıin baǵalady. Onyń qorytyndysyna sáıkes, Mysyrǵa ushatyn qazaqstandyq áýe kompanııalary úshin avıatsııalyq qaýipsizdikti qamtamasyz etýge tónetin qaýiptiń joǵary deńgeıi anyqtaldy.
Reseı, Ulybrıtanııa, Nıderlandtyń ushaqtary jáne Turkish Airlines áýe kompanııasy óz jolaýshylaryn qorǵaý jáne avıatsııalyq qaýipsizdikti qamtamasyz etý maqsatynda Mysyrǵa ushýdy ýaqytsha toqtatty.
Týrıstik kompanııalardyń aqparaty boıynsha búginde Sharm-esh-Sheıh reısterine 2016 jylǵy qańtardyń ortasyna deıin 800 týrpaket satylǵan.
Qazirgi ýaqytta Sharm-esh-Sheıh kýrortty aımaǵynda qazaqstandyq SCAT áýe kompanııasynyń charterlik reısimen 7 qarashada kelgen 233 adam bar.
Habarlaǵanymyzdaı, olar elimizge 17 qarashada jetkizilmek.
