Qazaqstandyq áýe kompanııalaryn tekserý qashan aıaqtalady

NUR-SULTAN. QazAqparat - QR Indýstrııa jáne ınfraqurylymdyq damý mınıstrliginiń keńeıtilgen alqa májilisinde azamattyq avıatsııanyń 2020 jylǵa arnalǵan mindetteri sóz boldy, dep habarlaıdy QazAqparat tilshisi.

«Memleket basshysynyń tapsyrmasymen birinshi jartyjyldyqta turaqty jolaýshy tasymalymen aınalysatyn barlyq avıakompanııalardy tekserý aıaqtalady. Jańa retteý modeline sáıkes qaýipsizdikti arttyrý jumysy jalǵasýda. Sondaı-aq, «Qazaqstan avıatsııa ákimshiligi» AQ-yn bilikti mamandarmen tolyqtyrý aıaqtalady jáne ınspektorlar qajetti oqytýdan ótedi. Osy jyly AQSh-qa ushý úshin FAA (AQSh azamattyq avıatsııasynyń federaldy basqarmasy) aýdıtinen ótýimiz kerek», - deıdi QR Indýstrııa jáne ınfraqurylymdyq damý vıtse-mınıstri Berik Qamalıev.

Jalpy alǵanda, azamattyq avıatsııa salasynda negizgi kórsetkishterdiń dınamıkasy turaqty ósim kórsetýde. 2019 jyldyń qorytyndysy boıynsha 8,6 mln jolaýshy tasymaldanǵan. Bul 2018 jyldyń sáıkes kezeńimen salystyrǵanda 9% kóp.

QR áýejaılarynda qyzmet kórsetilgen jolaýshylar sany - 17,7 mln.