Qazaqstandyq áýe kompanııalaryn «qara tizimnen» shyǵarýdyń vedomstvoaralyq is-sharalar jospary bekitildi
ASTANA. 4 jeltoqsan. QazAqparat - Qazaqstan Respýblıkasynyń Premer-Mınıstri Serik Ahmetov Halyqaralyq azamattyq avıatsııa uıymy (IKAO) aýdıtiniń eskertýlerin joıý jáne qazaqstandyq áýe kompanııalarynyń Eýropalyq odaqqa múshe elderge ushýǵa qoıylǵan shekteýlerin alyp tastaý jónindegi vedomstvoaralyq is-sharalar josparyn bekitti.
QR Kólik jáne kommýnıkatsııa mınıstrliginiń málimetinshe, osylaısha, atalǵan qujat qurylǵan vedomstvoaralyq jumys tobynyń birlese áreket etý sharalarynyń jospary bolyp tabylady.
Bekitilgen qujatta Azamattyq avıatsııa komıtetiniń baqylaý-qadaǵalaý mindetin atqaratyn ınspektorlarynyń shtattyq sanyn jáne ınspektorlardyń jalaqysyn salanyń bilikti qyzmetkerleriniń jalaqysy mólsherine deıin kóbeıtý, azamattyq avıatsııa salasynyń normatıvtik-quqyqtyq aktilerin IKAO-nyń talaptaryna sáıkestendirý, azamattyq avıatsııa salasyna úzdiksiz jáne tolyq baqylaý, qadaǵalaý júrgizýdi qamtamasyz etý maqsatynda Qazaqstan Respýblıkasynyń avıatsııa ákimshiliginiń qyzmetin avtomattandyrý sharalary qarastyrylǵan.
Budan basqa, is-sharalar jospary aıasynda Eýropalyq azamattyq avıatsııa konferentsııasymen (AAEK) Qazaqstannyń atalǵan uıymǵa múshelikke enýi kózdelgen yntymaqtastyq memorandýmyna qol qoıý josparlanǵan. Sonymen birge, ushýlar qaýipsizdigi salasynda aqparat jınaý jáne aqparat almasý maqsatynda Avıatsııalyq qaýipsizdik jónindegi eýropalyq agenttikpen (EASA) yntymaqtastyq kelisimin qabyldaý da kózdelip otyr.
Aıta keteıik 2009 jyldyń shildesinde júrgizilgen IKAO aýdıtiniń nátıjesinde «Eır Astana» AQ-nan basqa qalǵan 59 qazaqstandyq áýe kompanııalary Eýroodaqtyń «qara tizimine» engizilgen bolatyn. Qazirgi ýaqytta 59 áýe kompanııasynyń 37-si osy tizimde tur.
