Qazaqstandyq áýe kompanııalary Qytaı men Ózbekstanǵa reıster sanyn arttyrýǵa nıetti
Aıta keteıik, QR Indýstrııa jáne ınfraqurylymdyq damý mınıstrliginiń «Ashyq saǵat alańyndaǵy» kezekti jıyn áýe tasymalyndaǵy ózekti máselelerge arnaldy. Atap aıtqanda, basqosýda turaqty halyqaralyq jańa áýe reıster ashý men osy oraıda týyndaǵan túrli máseleler nazarǵa alyndy. Onyń barysynda «Eır Astana», «SCAT áýe kompanııasy» jáne «Qazaq Air» syndy otandyq avıakompanııalar ókilderi pandemııaǵa baılanysty toqyraýǵa ushyraǵan halyqaralyq turaqty áýe jelilerin qaıta qalpyna keltirý jáne ushý geografııasy aýmaǵyn keńeıtý barysyndaǵy is-sharalardy atap ótti.
Búginde halyqaralyq áýe tasymaly 28 memleketke 115 baǵyt boıynsha aptasyna 518 jıilikte oryndalady. Áýe qatynasy ornyqty jolǵa qoıylǵan elder qataryna Ázerbaıjan, Armenııa, Belarýs, Ulybrıtanııa, Germanııa, Gretsııa, Egıpet, Úndistan, Iran, Italııa, Katar, Qytaı, Kýveıt, Qyrǵyzstan, Maldıv araldary, Mońǵolııa, Nıderlandy, BAÁ, Polsha, RF, Saýd Aravııasy, Tájikstan, Taıland, Túrkııa, Ózbekstan, Chehııa jáne Ońtústik Koreıa kiredi.
Qazaqstandyq avıa tasymaldaýshylary 2022 jyldyń alǵashqy jartyjyldyǵynda halyqaralyq áýe jelileri arqyly 1,2 mln jolaýshy tasymaldaǵan. Bul kórsetkish ótken jyldyń sáıkes kezeńimen salystyrǵanda 60 paıyzǵa joǵary (0,7 mln).
Toqtala ketetin jaıt, Azamattyq avıatsııa komıteti otandyq áýe tasymaldaýshy kompanııalarǵa ushý geografııasy aýmaǵan keńeıtýdi talap etip otyr. Qazirgi kúnde bul tarapta birqatar jumystar atqarylýda. Atap aıtqanda, Pákistanmen áýe qatynasyn ornatý boıynsha jumystar júrgizilýde. Sondaı-aq suranystyń artýyna baılanysty Qazaqstan, Ózbekstan jáne Qytaıdyń birqatar qalasyna jańa baǵyttar ashý kózdelip otyr. Dese de jolaýshylar suranysyn tıisti deńgeıde qanaǵattandyrý múmkin bolmaı otyr. Máselen, karantındik shekteýlerge baılanysty búginde Qytaıǵa aptasyna 3 reıs qana jasalady. Al pandemııaǵa deıin 40-tan astam áýe tasymaly júzege asyrylatyn. Óz kezeginde suranystyń artýy bılet baǵasyna da óz áserin tıgizýde.
«Biz Qytaıdyń azamattyq avıatsııa bıligine reıs sanyn arttyrý boıynsha birneshe ret suranys hat joldadyq. Sonymen qatar jańa áýe baǵyttary men reıster sanyn kóbeıtý boıynsha ózbekstandyq áriptesterimizge de usynys bildirdik. Jýyq arada Qytaı, Ózbekstan jáne Pákistannyń avıatsııa bıligine atalǵan máselelerdi jedel sheshýge yqpal etýdi qaıta suraıtyn bolamyz», – dedi Azamattyq avıatsııa komıteti tóraǵasynyń orynbasary Saltanat Tompıeva.
Jıyn barysynda ushaqtardyń keshigýine baılanysty oryn alǵan oqıǵalar, keshikken reıster jolaýshylaryna kórsetiletin qosymsha qyzmetter zańdylyǵynyń buzylýyna baılanysty máselege nazar aýdaryldy.
«Kommertsııalyq avıakompanııa úshin ushaqtyń áýede bolǵany mańyzdy. Sebebi sonda ǵana ol qarjy ákeledi. Al onyń jerde bolýy shyǵyn ekendigi belgili. Bul tarapta áýe tasymaldaýshy kompanııalar ushý reısteriniń keshigýi nemese toqtatylýyna múddeli emes. Bul – basy artyq shyǵyn», – dep atap ótti QR IIDM ókili Saltanat Tompıeva.
Onyń aıtýynsha, zańda ushý qaýipsizdigi talaptaryn qamtamasyz etý maqsatynda reısterdi keshiktirgen avıakompanııalar kóp jaǵdaıda jolaýshylarǵa mindetti qyzmetterdi tıisti deńgeıde oryndamaıtyny ras. Sáıkesinshe olarǵa zańnamaǵa sáıkes shara qoldanylatyn bolady.
«Árıne, ushýdyń keshigýi nemese aýystyrylýy kóptegen qolaısyzdyqtar týdyrady. Alaıda tehnıkalyq aqaýlyqtar kez kelgen ýaqytta bolýy múmkin. Tasymaldaýshylar jolaýshylardy reıstiń ushýyn eki saǵattan artyq kútý kezinde alkogolsiz sýsyndarmen qamtamasyz etýge mindetti. Al reıstiń ushýyn tórt saǵattan artyq kútken kezde ystyq tamaq berilýi tıis», – dedi Saltanat Tompıeva.
Reısti kúndiz alty saǵat, túnde segiz saǵat kútken kezde jolýshylarǵa tasymaldaýshy usynǵan qonaqúıde turýǵa jáne tasymaldaýshy usynǵan kólikpen áýejaıdan qonaqúıge jáne keri qaıtý qyzmetteri kórsetilýi qajet. Tasymaldaýshynyń kinásinen reıs keıinge qaldyrylǵan nemese 10 saǵattan astam merzimge kidirtilgen jaǵdaıda, jolaýshynyń qalaýy boıynsha áýekompanııa joǵaryda atalǵan qyzmetterdiń barlyǵyn kórsete otyryp, jolaýshyny bılette kórsetilgen mejeli pýnktke deıin jaqyn arada ushatyn reıspen tasymaldaýdy qamtamasyz etýge mindetti.
«Bul qyzmetterdiń barlyǵy jolaýshylarǵa qoldanystaǵy zańnamaǵa sáıkes tegin kórsetiledi. Eger de tasymaldaýshy kompanııa óz mindetin oryndamaǵan jaǵdaıda jolaýshylar Azamattyq avıatsııa komıtetine shaǵymdana alady. Biz kelip túsken shaǵymdardy zerdelep, tıisti sheshim qabyldaıtyn bolamyz, – dep atap ótti Azamattyq avıatsııa komıteti tóraǵasynyń orynbasary.
