Qazaqstandyq áýe kompanııalary 14 jańa ushaq satyp alady
Atap aıtqanda, «SCAT» avıakompanııasy 9 ushaq, «Fly Arystan» – 3 jáne «Air Astana» 2 ushaqpen tolyqtyrylady. Bul týraly QR Indýstrııa jáne ınfraqurylymdyq damý mınıstri Qaıyrbek Óskenbaev Telegram-daǵy kanalynda jazdy.
Vedomstvo basshysynyń paıymdaýynsha, búgingi tańda áýe kóligindegi jolaýshylar aǵynynyń kúrt ósýi baıqalady. Bul óz kezeginde reısterdiń keshigýine ákep soǵyp, otandastarymyzdyń narazylyǵyn týdyryp otyr.
«Qalyptasqan máseleni jedel sheshý maqsatynda qazaqstandyq avıatasymaldaýshylarǵa jańa ushaqtar satyp alýdy tapsyrdym. Osylaısha, jyldyń sońyna deıin jalpy syıymdylyǵy 2,5 myń oryndy quraıtyn 14 jańa ushaq paıdalanýǵa beriletin bolady. Atalǵan sharalar tasymaldaý syıymdylyǵyn edáýir arttyra túspek», – dep jazdy mınıstr.
Sonymen birge áýe tasymaldaryna qatysty suranys jyldan jylǵa artyp kele jatqandyqtan, qazaqstandyq áýe kemeleri parki 2025 jylǵa deıin 51 birlikke ulǵaıatyny málim boldy.
Jalpy reısterdiń keshigý faktileri boıynsha túsip jatqan shaǵymdardy eskere kele, IIDM basshysynyń tapsyrmasy
boıynsha Azamattyq avıatsııa komıteti men Qazaqstannyń avıatsııalyq ákimshiligi tıisti tergeý amaldaryn bastap ketti. Eger jolaýshylardyń quqyqtaryn buzý faktileri anyqtalsa, tıisti avıakompanııalar ákimshilik jaýapqa tartylatyn bolady.
Sandardy sóıletsek, qazirgi ýaqytta áýe keńistiginde jolaýshylardy 75 ushaq tasymaldaıdy. 2022 jyldyń jarty jylynda tasymaldanǵan jolaýshylardyń sany ótken jyldyń sáıkes kezeńimen salystyrǵanda 10%-ǵa ósip, 4,6 mln jolaýshyny qurap otyr. Pandemııaǵa deıingi kezeńmen salystyrǵanda ósim 28 paıyzdy quraıdy.
