Qazaqstandyq áýe kompanııalar alty aıda 4 mln-ǵa jýyq jolaýshyny tasymaldady
Indýstrııa jáne ınfraqurylymdyq damý mınıstrliginiń málimetine sensek, bıylǵy alty aıda otandyq áýe kompanııalary 3 973 150 jolaýshyny tasymaldaǵan.
Onyń ishinde ishki jelilerde - 3 488 675 jáne halyqaralyq jelilerde - 484 475 jolaýshy bar.
Bir jyl buryn, COVID-19 pandemııasyna baılanysty jolaýshylar aǵynynyń aıtarlyqtaı tómendegeni baıqaldy.
Osylaısha 2020 jyldyń 12 aıynda otandyq áýe kompanııalar 5 260 014 jolaýshyny tasymaldady, bul - 2019 jylmen salystyrǵanda 27% tómen.
Otandyq áýe kompanııalarynyń (Eır Astana, Scat, Qazaq Air jáne FlyArystan) boljamdary boıynsha aǵymdaǵy jyldyń sońyna qaraı jolaýshylar aǵynynyń jalpy sany 9 093 022-ge deıin ósýi tıis.
Onyń ishinde 2021 jyly «Eır Astana» AQ áýe kompanııasy - 3 482 790 jolaýshy, «Scat» AQ áýe kompanııasy - 1 569 410 jolaýshy, «Qazaq Air» AQ áýe kompanııasy - 575 996 jáne naryqqa jaqynda kirgen «FlyArystan» áýe kompanııasy 3 464 826 jolaýshy tasymaldaıdy dep josparlanyp otyr.
Osylaısha, bıyl jolaýshylar aǵynynyń sany 2019 jylǵy kórsetkishten (7 227 127 jolaýshy) asady dep kútilýde.
Jekelegen áýe kompanııalarda, atap aıtqanda «FlyArystan» ótken aýyr jylǵa qaramastan, qyzmet kórsetilgen jolaýshylar sany boıynsha jyl saıynǵy ósimdi kórsetedi (2019 jyly - 700 233, 2020 jyly – 1 467 261 jáne 2021 jyldyń birinshi jartyjyldyǵynda – 1 379 400).
