Qazaqstandyq aýdıtorlar AHQO-da halyqaralyq dárejede bilim alady
NUR-SULTAN. QazAqparat – «Astana» halyqaralyq qarjy ortalyǵy Bıýrosynda qazaqstandyq aýdıtorlar úshin jańa halyqaralyq baǵdarlama bastalady, dep habarlaıdy QazAqparat tilshisi.
Bul týraly «AHQO Ákimshiligi» AQ Basqarma tóraǵasynyń orynbasary Ernur Rysmaǵambetov Іshki aýdıt máseleleri boıynsha alǵashqy ulttyq konferentsııada habarlady.
Jańa jobany QR Qarjy mınıstrligi, AQHO Bıýrosy jáne CIA (Certified Internal Auditor) halyqaralyq sertıfkattaý toby birlesip uıymdastyrady.
«Ázirge Bıýroda qarjy, ınvestıtsııa, býhgalterlik esep jáne aýdıt salasynda onǵa jýyq baǵdarlama bar. Jańa 11 baǵdarlamanyń negizgi mindeti - ishki jáne syrtqy aýdıtorlardy qaıta daıarlyqtan nemese daıarlyqtan ótkizip, olardy halyqaralyq deńgeıge shyǵarý. Munda biz eresek adamdardy oqytamyz. Sondyqtan, olardyń sanasynan qajetsiz bilimderdi shyǵaryp, jańa bilimge ázirleý qajet», - dedi E. Rysmaǵambetov.
Onyń aıtýynsha, baǵdarlama kúzde bastalady jáne oǵan deıin oqytýshylardy daıyndaý josparlanyp otyr.
«Eń aldymen jergilikti oqytýshylardy ázirleımiz, sebebi olardyń sany bizde jetkiliksiz. Kúzde AHQO Bıýrosy sabaq berýshilerdi daıarlaıdy. Ári qaraı pılottyq rejımde Qarjy mınıstrligimen birlesip, kishigirim top quramyz. Onyń barysy jyl sońyna deıin baqylanady. Sodan keıin ǵana, aýdıtorlardy oqytý bastalady», - dedi AHQO ókili.
Sonymen birge, E. Rysmaǵambetov Qarjy mınıstrliginiń barlyq aýdıtorlardy qaıta oqytýdy josparlap otyrǵanyn jetkizdi. Olardy oqytý formasy áli talqylanyp jatyr.
«Shamamen alǵanda, aqyly jáne tegin oqytý formalary bolady. Ádette bizdiń barlyq baǵdarlamalarymyzǵa bilim alýshy aqy tóleıdi jáne synaqty sátti tapsyrsa, onyń barlyq shyǵyny qaıtarylady. Aldaǵy baǵdarlamaǵa dál osy tásildi qoldanamyz dep oılaımyn. Degenmen, aǵylshyn tilindegi halyqaralyq baǵdarlama memlekettik qana emes, barlyq ishki kvazımemlekettik, jeke bıznes aýdıtorlaryna qoljetimdi bolady», - dedi ol.
Ernur Rysmaǵambetov kez kelgen aýdıtordyń AHQO Bıýrosy bazasynda bilim alyp, halyqaralyq bilikti ishki aýdıtor mártebesin ala alatynyn eske saldy.
