Qazaqstandyq atletter Olımpıada joldamasyna talasady
ASTANA. QazAqparat - Búgin, ıaǵnı 4 shilde de Býenos-Aıreste ótetin Jasóspirimder Olımpıadasyna Azııa aımaqtyq irikteý syny bastalady, dep habarlaıdy QazAqparat tilshisi.
QR UOK-niń baspasóz qyzmeti taratqan málimetterge súıensek, qurlyqtyń 2001-2002 jyldary týǵan úzdik jeńil atletteri Azııaǵa bólingen 89 joldamaǵa talasatyn bolady. Jasóspirim er balalar sporttyń 18 túrinen 57 joldama, qyzdar 32 lıtsenzııaǵa talaspaqshy.
Qazaqstan quramasy sapynan atalǵan jarysqa 36 sportshy qatysady. Er balalar sporttyń 13 túri boıynsha, qyzdar 16 túri boıynsha baq synaıdy. Ár dıstsıplınadaǵy kvotalar sany da ártúrli (birden segizge deıin). Osyǵan qarap, Olımpıada joldamasyn jeńip alý ońaıǵa soqpaıtynyn bilýge bolady.
Otandyq sportshylar men bapkerler 1 shilde kúni Bangkokke ushyp ketti. Sapar aldynda rezervtegi Qazaqstan quramasynyń aǵa bapkeri Tatıana Nazarova óz oıymen bólisken bolatyn.
«Árıne, jarysý ońaı emes. Qarsylastar qatarynda Qytaı, Koreıa, Qytaılyq Taıpeıdiń úzdik sportshylary bar. Biz joldama úshin kúresemiz. Bizdegi qyzdardyń áleýeti jaqsy.Qyzdar arasynda bıiktikke sekirý men júgirýde jaqsy nátıje bolady degen oıdamyn», - deıdi bapker.
