Qazaqstandyq atlet Azııa chempıonatynyń altyn medaline ıe boldy
ASTANA. QazAqparat - Úndistannyń Bhýbaneshvar qalasyndaǵy «Kalınga» stadıonynda jeńil atletıkadan Azııa chempıonaty ótip jatyr. 6 shilde kúni qazaqstandyq sportshylar júldesiz qaldy. Alaıda ekinshi jarys kúninde birden qorjynǵa úsh medal tústi.
Bul joly taǵy da qyzdarymyz qýantty. 100 metrge júgirýden Vıktorııa Zıabkına chempıon atandy. Zıabkına bul qashyqtyqty 11, 39 sekýndta júgirip ótti. Kúmis júldeni taǵy bir jerlesimiz Olga Safronova enshiledi. Onyń ýaqyt kórsetkishi - 11,45 sekýnd. Úzdik úshtikti úndistandyq Dýtı Chand(11,52 sekýnd) qorytyndylady.
Qola medaldy ıadro serpýshi Ivan Ivanov jeńip aldy. Almaty oblysynyń týmasynyń eń úzdik kórsetkishi - 19,41 metr boldy. Altyn ırandyq Alı Samarıǵa (19,80 m) buıyrsa, kúmiske úndistandyqTadjınder Sıngh (19,77 m) qol jetkizdi.
400 metrge júgirýden áıelder jáne erler arasyndaǵy básekede Merdjen Ishangýlıeva (58,68 sek.), Adelına Ahmetova (1.01,34 mın.) jáne Dmıtrıı Koblov (50,99 sek.) irikteý synynan irkilmeı ótip, fınalǵa joldama aldy. Fınal 8 shilde kúni ótedi.
Jalpy, chempıonattyń eki jarys kúninde 18 medal jıyntyǵy sarapqa salyndy. Beıresmı týrnır kestesinde Úndistan sportshylary kóshbastap tur. Jarys qojaıyndary 6 altyn, 3 kúmis, 6 qola medal enshilep úlgergen. Ekinshi orynda Qytaı atletteri (4, 3, 3), úshinshi orynda - Iran (3, 0, 1), al Qazaqstan quramasy tórtikti túıindep tur (1, 1, 1).
