Qazaqstandyq atlet álemdik reıtıngte birinshi orynda tur
ASTANA. QazAqparat - Qaraǵandy oblysynyń jeńil atleti Marııa Ovchınnıkova úsh qarǵyp sekirýden 20 jasqa deıingi sportshylar arasynda álemdik reıtıngte birinshi orynda tur. Bul týraly QR jeńil atletıka federatsııasy málim etti.
Marııa - 1998 jyly Qaraǵandy oblysynyń Temirtaý qalasynda dúnıege kelgen. Sportshy maýsym aıynda Ǵusman Qosanov memorıalynda 13,94 metrge sekirip, óziniń sporttyq karerasyndaǵy ázirge eń úzdik nátıjesin kórsetti. Osy kórsetkishiniń arqasynda ol 20 jasqa deıingi atletter arasynda birinshi orynda keledi. Buǵan deıin Ovchınnıkovanyń jeke rekordy - 13,67 metr bolatyn.
Bıylǵy jyly jerlesimizdiń rekordyn tek Belarýs qyzy Vıoletta Skvortsova ǵana qaıtalady. Ol 21 shilde kúni Italııadaǵy týrnırlerdiń birinde 13,94 metrge sekirdi.
Alǵashqy bestikke sondaı-aq Davısleıdı Velasko (Kýba) - 13.72, Ilıonıs Gýıallýme (Frantsııa) - 13.65 jáne 13,64 metrge sekirgen Naomı Ogbıta (Ulybrıtanııa), Kvýdjıao Tan (Qytaı), Aleksandra Naıcheva (Bolgarııa) sekildi úsh sportshy enip otyr.
Ovchınnıkova Úndistannyń Bhýbaneshvar qalasynda ótken Azııa chempıonatynda 13,72 metrge sekirip, chempıon atandy. Endi Londondaǵy álem birinshiligine qatysady. Jas sportshynyń bolashaǵynan mamandar úlken úmit kútedi. Sondyqtan bul nátıje sol joǵary jetistikterdiń bastaýy bolady dep senemiz.
Foto: zimbio.com
