Qazaqstandyq «Astana» komandasy «Dakar» rallıinde jalpy eseptegi 3-oryndy saqtap qaldy
ASTANA. 13 qańtar. QazAqparat - «Dakar» rallıiniń 11-kezeńinen keıin, qazaqstandyq «Astana» komandasy jalpy eseptegi 3-oryndy saqtap qaldy,
dep habarlaıdy jarystyń resmı saıty.
Keshe, 11-kezeńde Artýr Ardavıchýstyń júk kóligi márege kezeń jeńimpazy - reseılik Andreı Kargınovtan 22 mınýt 44 sekýndqa qalyp keldi. Eske sala keteıik, qazaqstandyq ekıpaj bunyń aldynda, 10-kezeńde jeńiske jetken bolatyn. Atalmysh jarystan keıin A. Ardavıchýs jalpy eseptegi 3-oryndy saqtap qaldy. Alaıda tizimniń kósh basynda kele jatqan Jerar de Roı arasyndaǵy ýaqyt aıyrmashylyǵy 1 saǵat 20 mınýtqa deıin uzardy.
Ardavıchýstyń ekinshi oryn úshin basty baqtalasy Hans Steısı 11-kezeńde márege ekinshi kelip, jerlesimizden 19 mınýtqa ozyp ketti. Rallı-reıdtiń aıaqtalýyna deıin 3 kezeń bar. Búgin 13 qańtarda komandalar Perýdiń Arekıpa men Naska taýlary arasyndaǵy aralyqty júrip ótedi.
