Qazaqstandyq áskerılerdiń quqyǵy týraly kitap jaryq kórdi
ALMATY. Aqpannyń 11-i. QazAqparat /Erbol Azanbek/ - Búgin Almatydaǵy QR UQQ shekara qyzmetiniń «Shyǵys» aımaqtyq basqarmasynda «Qazaqstan Respýblıkasyndaǵy áskerılerdiń quqyǵy men zańdyq qyzyǵýshylyqtaryn qorǵaý» dep atalatyn kitaptyń tanystyrylymy ótti,
dep habarlaıdy QazAqparat.
Kitap «Generaldar keńesi» qoǵamdyq birlestigi zapastaǵy general-maıor, keńes prezıdıýmy tóraǵasynyń orynbasary, QR Ulttyq qaýipsizdik komıtetiniń qurmetti múshesi Tursyn Aıjolov pen zapastaǵy polkovnık, zańger Aıbolat Qurmanbaıdyń qurastyrýymen shyǵarylǵan.
«Buǵan deıin áskerı bólimderde, áskerı oqý oryndarynda, áskerı garnızondarda, aımaqtyq basqarmalarda tájirıbelik konferentsııalar ótkizildi. Sondaı-aq áskerılerdiń usynystaryn eskere otyryp, elimizdegi zańdarǵa saraptama júrgizý nátıjesinde atalǵan eńbek jaryqqa shyqty», deıdi Tursyn Aıjolov. Shyǵarmada bunymen qatar qazaqstandyq áskerılerdiń quqyǵy baǵytyndaǵy zańdardy jetildirý týraly usynystar men Reseı Federatsııasy, Belarýs Respýblıkasynyń zańdaryna salystyrmaly zertteý, áskerılerdiń basylymdarda jarııalanǵan maqalalary berilgen. «Kitap árbir qazaqstandyq ásker úshin taptyrmas qural bolyp tabylady», deıdi kitapty qurastyrýshylar.
Olardyń aıtýynsha, ekinshi bólimi de shyǵarylady. Óıtkeni áskerılerdi áleýmettik qorǵaý kún tártibindegi máseleniń biri. «Áskerılerdi áleýmettik qorǵaý jónindegi zań 1993 jyly qabyldanǵan bolatyn. Qazir bul zań birqatar máseleler boıynsha eskirdi. Ýaqyt ózgerip otyrady. Sondyqtan ony jańartý kerek», degen pikirde T.Aıjolov.
