Qazaqstandyq áskerıler paradqa qatysý úshin Máskeýge keldi
Qurlyq áskerleri bas qolbasshysynyń jaýyngerlik daıarlyq jónindegi orynbasary general-maıor Dáýlet Ospanov bastaǵan Qazaqstan Qarýly kúshteri Desanttyq-shabýyldaýshy áskerı qyzmetshileriniń saltanatty esebi Jeńistiń 75 jyldyǵyna arnalǵan áskerı paradqa qatysý úshin Reseıge keldi.
Jaqynda paradqa qatysýshylary mingen ushaq Máskeý mańyndaǵy «Chkalovskıı» áskerı áýe aılaǵyna qondy.
«Daıyndyq kezinde qazaqstandyq áskerı qyzmetshiler «Zvenıgorodskıı» áskerı shıpajaıynda turady. Paradqa qatysatyndar jergilikti adamdarmen qarym-qatynasty jasamaý úshin jattyǵýdan basqa ýaqytta aýmaqtan shyǵýǵa tyıym salynady.
Áskerı qyzmetshiler Máskeýge keter aldynda koronavırýsqa PTR test tapsyrdy. O lar ár úsh kún saıyn koronavırýsqa qatysty PTR test tapsyrady», delingen habarlamada.
Daıyndyq aldyn alý jáne epıdemııaǵa qarsy is-sharalar keshenin oryndaı otyra, karantın sharalaryn qatań saqtaý arqyly júzege asyrylady.
Atap aıtqanda: táýligine eki ret medıtsınalyq tekserý, nysandardy sanıtarlyq óńdeý jáne jeldetý, áskerı qyzmetshilerdi qajetti dezınfektsııalaý jáne medıtsınalyq jeke qorǵanys quralymen qamtamasyz etý.
Jattyǵýlar Máskeý mańyndaǵy «Alabıno» polıgonynda ótedi. Jalpy parad esebindegi qazaqstandyq áskerı qyzmetshilerdiń birinshi jattyǵýy 15 maýsymǵa josparlanǵan.
