Qazaqstandyq áskerıler qalaǵa shabýyl jasalǵan jaǵdaıdaǵy daıyndyǵyn pysyqtady

NUR-SULTAN. QazAqparat - Mańǵystaý oblysynda ornalasqan «Batys» óńirlik qolbasshylyǵynyń «Oımasha» oqý-jattyǵý polıgonynda eldi mekenge shabýyl jasalǵan kezdegi is-áreketter pysyqtaldy. Bul týraly QR Qorǵanys mınıstrliginiń baspasóz qyzmetinen málim etti, dep habarlaıdy QazAqparat.

«Eldi mekenge shabýyldaý kezindegi batalondyq taktıkalyq top» taqyrybyndaǵy shara barysynda jalpyáskerı jáne desanttyq-shabýyldaý brıgadalarynyń komandırlerimen kórsetpeli ádistemelik-nusqaýlyq sabaqtar ótti.

Sabaqtardyń basty maqsaty shabýyldaý jasaǵynyń quramy men yqtımal tapsyrmalaryn jetkizý, komandırlerdiń eldi mekenge shabýyldaýǵa bólimsheniń daıyndyǵy jóninde jumys erekshelikterin uǵynýy jáne shabýyldaý jasaý kezinde jeke quram men áskerı tehnıkanyń is-qımyldaryn kórsetý boldy.

Sabaqtar barysynda shabýyldaý jasaǵynyń quramyn tańdaý jáne eldi mekendi barlaý jónindegi máseleler qaraldy. Sondaı-aq eldi mekenge shabýyldaý jasaý kezinde batalondyq taktıkalyq top jeke quramy men áskerı tehnıkasynyń praktıkalyq is-qımyldary pysyqtaldy.

«Batys» Óńirlik qolbasshylyǵy áskerleriniń qolbasshysy general-maıor Qanysh Ábýbákirovtiń aıtýynsha, búgingi áskerı qaqtyǵystardyń sıpaty men ýrbanızatsııalanýdyń joǵary deńgeıi bolashaqta jaýyngerlik is-qımyldar kóbinese qalalyq jerlerde ótetinin uǵyndyryp otyr.